راجستھان: اسکول کی چھت گرنے سے 4 بچے جاں بحق، متعدد زخمی

جھالاواڑ: راجستھان کے جھالاواڑ ضلع کے منوہرتھانہ علاقے میں جمعہ کی صبح ایک المناک حادثہ پیش آیا۔ گاؤں پپلوڈی میں واقع گورنمنٹ ہائر پرائمری اسکول کی چھت اچانک گر گئی۔ حادثے میں تقریباً 19 بچے ملبے تلے دب کر شدید زخمی ہو گئے۔

موصولہ اطلاعات کے مطابق بچے اسکول پہنچنے کے بعد مارننگ پرئیر کے لیے جارہے تھے کہ اچانک اسکول کی عمارت کا ایک کمرہ گر گیا۔ چھت گرنے سے 19 بچے دب گئے جنہیں گاؤں والوں اور اسکول کے عملے کی مدد سے باہر نکالا گیا۔

ڈانگی پورہ تھانہ انچارج وجیندر کمار نے جانکاری دیتے ہوئے کہا کہ تمام بچوں کو ملبے سے بحفاظت نکال لیا گیا ہے۔ ضلعی انتظامیہ، پولیس اور محکمہ تعلیم کے اعلیٰ حکام موقع پر پہنچ گئے ہیں۔ راحت اور بچاؤ کا کام تیزی سے جاری ہے۔

چار بچے ہلاک، متعدد زخمی:

تمام زخمی طلباء کو منوہرتھنا کے پرائمری ہیلتھ سینٹر (سی ایچ سی) لے جایا گیا، جہاں ڈاکٹروں نے چار بچوں کو مردہ قرار دے دیا۔ باقی 15 زخمیوں میں سے 8 کو تشویشناک حالت میں جھالاواڑ ڈسٹرکٹ اسپتال ریفر کر دیا گیا ہے۔

ابتدائی معلومات کے مطابق، منوہرتھنا بلاک کے پپلوڈی کے گورنمنٹ ہائر پرائمری اسکول میں جمعہ کو ایک بڑا حادثہ پیش آیا۔ اسکول کی عمارت کے تباہ شدہ کمرے کی چھت اچانک گر گئی۔

حادثے کی اطلاع ملتے ہی پولیس اور انتظامیہ کی ٹیم موقع پر پہنچ گئی۔ جے سی بی مشینوں کی مدد سے ملبہ ہٹایا جا رہا ہے۔ بتایا جا رہا ہے کہ علاقے میں گزشتہ کچھ دنوں سے مسلسل بارش ہو رہی ہے جس کی وجہ سے اسکول کی عمارت کمزور پڑ گئی ہے۔ انتظامیہ نے زخمیوں کو قریبی اسپتال میں داخل کرایا ہے۔