راجیو سے متعلق اشتہار کا پیسہ غریبوں پر خرچ کرے گی کانگریس

نئی دہلی،21 مئی(یواین آئی)کانگریس نے سابق وزیراعظم راجیو گاندھی کی برسی پر جمعرات کو ان کی یاد میں دئے جانے والے اشتہار وغیرہ میں خرچ ہونے والے پیسوں کو کام گاروں کی مدد میں خرچ کرنے کا فیصلہ کیا ہے۔

کانگریس نے یہاں جاری بیان میں کہا’’آج سابق وزیراعظم اور بھارت رتن آنجہانی راجیو گاندھی جی کی قربانی کے دن پرملک کے ہر شہری نے انہیں یاد کر کے خراج عقیدت پیش کیا ہے۔‘‘

پارٹی نے کہا،’’کورونا وائرس وبا کی وجہ سے کانگریس پارٹی نے یہ فیصلہ کیا ہے کہ اس بار برسی پر اشتہار دینے کے بجائے یہ ساری رقم مزدوروں ،کام گاربھائیوں کی مدد کے لئے لگائی جائےگی۔

پورے ملک میں کانگریس کارکنان نے بھی اس یوم تحریک پر ہر ضرورت مند کی خدمت کا عزم لےکر اپنی ہر کوشش اس سمت میں مرکوز کرنے کا عہد دہرایا ہے۔