سب سے زیادہ کمائی میں سلمان اور اکشے نے شاہ رخ کو پیچھے چھوڑ دیا

فوربز کی تازہ ترین سب سے زیادہ کمائی کرنے والی سیلیبریٹیز کی فہرست میں ہالی وڈ اداکار جارج کلونی کے ساتھ بالی وڈ کے اداکار سلمان خان اور اکشے کمار بھی شامل ہیں۔

جارج کلونی نے گذشتہ سال 12 مہینوں کے دوران تمام اداکاروں میں سب سے زیادہ پیسے کمائے۔ اس میں کچھ حصہ ان کی ٹکیلا کمپنی کی فروخت کا بھی ہے جسے انھوں نے شراکت داری میں قائم کیا تھا۔

فوربز نے 57 سالہ ہالی وڈ اداکار کلونی کی یکم جون سنہ 2017 سے 31 مئی سنہ 2018 کے دوران کمائی تقریباً 24 کروڑ ڈالر بتائی ہے۔

اس طرح وہ دنیا میں سب سے زیادہ کمائی کرنے والے سیلیبریٹیز کی فہرست میں دوسرے نمبر پر ہیں جبکہ کائيلی جینر تیسرے نمبر پر ہیں۔ کائیلی کے بارے میں اس مہینے کے اوائل میں فوربز نے کہا تھا کہ سوشل میڈیا کی سٹار سب سے کم عمر خود ساختہ ارب پتی بننے والی ہیں۔

بالی وڈ اداکار اکشے کمار اپنی فلم ‘ٹوائلٹ ایک پریم کتھا’ اور ‘پیڈ مین’ کی کامیابیوں کے طفیل اس فہرست میں سلمان خان سے آگے ہیں۔ وہ 76 ویں نمبر پر ہیں جبکہ سلمان خان 82 ویں نمبر پر ہیں۔

اس سے قبل سلمان 71 ویں پوزیشن پر تھے جبکہ اکشے کمار 80 نمبر پر تھے۔ گذشتہ سال بالی وڈ اداکاروں میں شاہ رخ خان سب سے آگے 65 ویں پوزیشن پر تھے۔