بولی وڈ کے دبنگ اداکار سلمان خان کو ایک گمنام فون کالر کی جانب سے جان سے مار ڈالنے کی دھمکی دی گئی ہے.
انڈین ایکسپریس کی ایک رپورٹ کے مطابق ممبئی پولیس اسٹیشن میں کسی گمنام شخص نے کال کر کے بولی وڈ اداکار سلمان خان کو جان سے مار ڈالنے کی دھمکی دی ہے۔
پولیس کا کہنا ہے کہ یہ کسی کا مذاق بھی ہوسکتا ہے تاہم اس حوالے سے تحقیقات کا آغاز کردیا گیا ہے.
رپورٹس کے مطابق پولیس نے اس مقام کا تعین کرلیا ہے جہاں سے فون کال کی گئی تاہم اب تک اس حوالے سے کوئی رپورٹ تھانے میں درج نہیں کرائی گئی۔
سلمان خان نے حال ہی میں دو بلاک بسٹر فلموں میں کام کیا ہے جن میں کبیر خان کی ’بجرنگی بھائی جان‘ اور سورج برجاتیہ کی ’پریم رتن دھان پایو‘ شامل ہیں۔
دونوں ہی فلموں نے باکس آفس پر بڑی کامیابی حاصل کی تھی۔
سلمان خان اس وقت اپنی فلم ’سلطان‘ کی شوٹنگ میں مصروف ہیں جس میں ان کے ہمراہ انوشکا شرما اہم کردار کرتی نظر آئیں گی۔
علی عباس ظفر کی ہدایت میں بننے والی فلم ’سلطان‘ میں سلمان خان ریسلرکے روپ میں نظر آئیں گے۔
سلمان خان کی دوسری فلم ’سلطان‘ شاہ رخ خان کی فلم ’رئیس‘ کے مدمقابل رواں سال عید پر ریلیز کی جائے گی۔
