سنجے دت ایک بار پھر گینگسٹر بننے کے لیے تیار

بولی وڈ کے بابا سنجے دت اگرچہ گزشتہ ایک دہائی سے کامیڈی فلموں میں بھی کام کرتے دکھائی دیے رہے ہیں، تاہم انہیں شہرت ان کے گینگسٹر اور دبنگ کرداروں کی وجہ سے ملی۔

’کھل نائک، کانٹے، مسافر، وستاو اور اگنی پتھ‘ جیسی فلموں میں طاقتور ہیروز سے بھی زیادہ طاقتور ولن کا کردار ادا کرنے والے سنجو بابا ایک بار پھر گینگسٹر گرو کے روپ میں نظر آئیں گے۔

جی ہاں، جیل سے رہائی کے بعد جہاں وہ ’بھومی‘ جیسی فلم میں ایک والد کے کردار میں نظر آئے، وہیں اب وہ ’صاحب، بیوی اور گینگسٹر 3‘ میں طاقتور گرو کا کردار کرتے نظر آئیں گے۔

یہ پہلا موقع ہے کہ سنجے دت ’صاحب بیوی اور گینگسٹر‘ کی سیریز میں جلوہ گر ہو رہے ہیں۔

خیال رہے کہ’صاحب بیوی اور گینگسٹر‘ سیریز کی پہلی فلم اسی نام سے 2011 میں ریلیز ہوئی تھی، جس میں رندیپ ہودا، جمی شیرگل اور ماہی گل نے کردار ادا کیا تھا۔

پہلی فلم میں جمی شیرگل نے ’صاحب‘ جب کہ رندیپ ہودا نے منفی یعنی گینگسٹر کا کردار ادا کیا تھا، اور ماہی گل ’بیوی‘ کے روپ میں نظرآئی تھیں۔

فلم نے باکس آفس پر ریکارڈ بزنس کیا، جس کے بعد اس سیریز کی دوسری فلم ’صاحب بیوی اور گینگسٹر رٹرنز‘ کو 2013 میں ریلیز کیا گیا۔

دوسری فلم میں بھی جمی شیرل اور ماہی گل نے اپنے کرداروں کو برقرار رکھا، جب کہ اس بار منفی کردار کے لیے رندیپ ہودا کی جگہ عرفان خان کو کاسٹ کیا گیا، ساتھ ہی سوہا علی خان کو بھی شامل کیا گیا۔