’سب کا ساتھ سب کا وکاس‘ اصول کے تحت این ڈی اے کے سات برس

نئی دہلی، ؛ وزیر اعظم نریندر مودی نے اتوار کو کہا کہ قومی جمہوری اتحاد (این ڈی اے) کی حکومت کے سات سالہ دور حکومت میں ملک ‘سب کا ساتھ سب کا وکاس’ کے اصول پر عمل پیرا ہے۔مسٹر مودی نے اپنے ماہانہ ریڈیو پروگرام “مان کی بات” میں وطن عزیز سے خطاب کرتے ہوئے کہا کہ این ڈی اے کے حکمرانی کے سات برسوں کے دوران حکومت نے ہر لمحہ ملک کی خدمت میں پوری لگن کے ساتھ کام کیا ہے اور ان سات برسوں میں جو بھی کامیابیاں حاصل کی ہیں وہ ملک اور اہل وطن کی رہی ہیں۔

انہوں نے بتایاکہ “ہم دیکھتے ہیں کہ ہندوستان اب دوسرے ممالک کی سوچ اور ان کے دباؤ میں نہیں، اپنے عزم سے چلتا ہے۔ جب ہم دیکھتے ہیں کہ اب ہندوستان اپنے خلاف سازش کرنے والوں کو منھ توڑ جواب دیتا ہے تو ہماری خود اعتمادی اوربڑھ جاتی ہے۔
جب ہندوستان قومی سلامتی کے معاملات پر سمجھوتہ نہیں کرتا ، جب ہماری افواج کی طاقت بڑھتی ہے تو ہم محسوس کرتے ہیں کہ ہاں ہم صحیح راہ پر گامزن ہیں۔ ‘‘

وزیر اعظم نے کہا کہ لوگ ملک کی ترقی پر خوش ہیں کیونکہ 70 سال بعد پہلی بار ان کے گاؤں تک بجلی پہنچی ہے ، ان کے بیٹے اور بیٹیاں پنکھے میں بیٹھ کر روشنی میں تعلیم حاصل کررہی ہیں۔ کتنے لوگ کہتے ہیں کہ ہمارا گاؤں بھی اب ایک پکی سڑک کے ذریعہ شہر سے جڑگیا ہے۔

انہوں نے بتایاکہ “مجھے یاد ہے کہ قبائلی علاقے کے کچھ ساتھیوں نے مجھے یہ پیغام بھیجا تھا کہ سڑک کی تعمیر کے بعد پہلی بار انہیں لگا کہ وہ بھی باقی دنیا سے جڑگئے ہیں۔ ایسا ہی کوئی بینک اکاؤنٹ کھلنے پر اپنی خوشی کا اشتراک کرتا ہے۔ جب کوئی مختلف اسکیموں کی مدد سے کوئی نیا کام شروع کرتا ہے تو وہ مجھے اپنی اس خوشی میں بھی مدعو کرتا ہے۔
‘پردھان منتری آواس یوجنا’ کے تحت مکان ملنے کے بعد مجھے اپنے شہریوں سے گرہ پرویش کے انعقاد کے موقع پر کتنے ہی دعوت نامے ملتے رہتے ہیں۔ ان سات برسوں میں آپ سب کی کروڑوں خوشیوں میں میں شامل رہا ہوں۔