’جنسی ہراسانی‘: سول خاتون جج نے سپریم کورٹ میں کی ’خوداختیاری موت‘ کی فریاد

نئی دہلی، 15 دسمبر (یو این آئی) اتر پردیش کی ایک خاتون جج نے سپریم کورٹ  کے چیف جسٹس ڈی وائی چندر چوڑ کو خط لکھ کر ’خوداختیاری موت‘ کی اجازت مانگی  ہے۔

خاتون جج کا الزام ہے کہ ایک ڈسٹرکٹ جج نے اسے جنسی طور پر ہراساں کیا اور بار بار کی فریاد کرنےکے باوجود کوئی کارروائی نہیں کی گئی جس کی وجہ سے وہ انتہائی مایوس ہے۔

وہ اس وقت ضلع بانڈہ میں سول جج کے عہدے پر فائز ہیں۔ انہوں نے  خط میں دعویٰ کیا ہے کہ مبینہ واقعہ  بارہ بنکی میں ان کے  عہدے پر رہنے کے دوران پیش آیا تھا۔ انہوں نے الزام لگایا کہ متعلقہ ڈسٹرکٹ جج نے رات کو ان سے ملنے کو کہا تھا۔

 سپریم کورٹ کے چیف جسٹس کو مخاطب  سوشل میڈیا پر وائرل ہونے والے خط میں اس  شکایت کنندہ خاتون نے  دعویٰ کیا  ہے کہ  ’’مجھ میں  اب جینے کی کوئی خواہش نہیں ہے۔ پچھلے ڈیڑھ سال میں مجھے چلتی پھرتی لاش بنا دیا گیا ہے۔

اس بے جان جسم کو ادھر ادھر لے جانے کا کوئی مقصد نہیں۔ میری زندگی میں کوئی مقصد باقی نہیں رہا۔ براہ کرم مجھے اجازت دیں کہ میں اپنی زندگی باوقار طریقے سے ختم کروں۔‘‘ انہوں نے خط میں مزید لکھا ’’جب میں خود مایوس ہوں تو دوسروں کو کیا انصاف دوں گی۔‘‘

یہ خط سوشل میڈیا پر وائرل ہوتے ہی سپریم کورٹ کے چیف جسٹس کی ہدایت پر   سپریم کورٹ کی انتظامیہ نے اس معاملے کا نوٹس لیتے ہوئے الہ آباد ہائی کورٹ انتظامیہ سے ان کی (خاتون جج) شکایت کی زیر التواء تحقیقات کی صورتحال کے بارے میں معلومات فراہم کرنے کو کہا۔

سپریم کورٹ کے سکریٹری جنرل اتل ایم کورہیکر نے چیف جسٹس کی ہدایت پر جمعرات کو الہ آباد ہائی کورٹ کے رجسٹرار جنرل کو ایک خط لکھ کر متعلقہ متعلقہ جج کی شکایت سے نمٹنے والی اندرونی شکایات کمیٹی (آئی سی سی) کے سامنے کارروائی کی صورتحال کی تفصیلات مانگی ہیں۔

خاتون جج کی طرف سے دائر کی گئی ایک رٹ پٹیشن بدھ کو مسترد کر دی گئی کیونکہ ان کی شکایت پر پہلے ہی آئی سی سی غور کر رہی تھی۔

چیف جسٹس کو بھیجی گئی شکایت میں خط میں دعویٰ کیا گیا ہے کہ سپریم کورٹ نے آٹھ سیکنڈ کی سماعت کے بعد ان کی درخواست مسترد کر دی تھی۔

شکایت کنندہ نے دعویٰ کیا ہے کہ شکایت 2022 میں الہ آباد ہائی کورٹ کے چیف جسٹس اور انتظامی جج کو دی گئی تھی، لیکن آج تک کوئی کارروائی نہیں کی گئی۔ اس کے بعد انہوں نے جولائی 2023 میں ہائی کورٹ کی اندرونی شکایات کمیٹی میں شکایت درج کرائی۔

خط میں مزید کہا گیا ہے کہ تحقیقات شروع کرنے میں چھ ماہ اور ایک ہزار ای میلز لگ گئے اور مجوزہ تحقیقات بھی محض ایک ڈھونگ ہے۔ شکایت کنندہ نے دعویٰ کیا ’’تفتیش میں گواہ ڈسٹرکٹ جج کے فوری طور پر ماتحت ہیں۔ کمیٹی  کیسے توقع کرتی ہے کہ گواہ اپنے باس کے خلاف گواہی دیں گے؟ یہ میری سمجھ سے بالاتر ہے۔‘‘

خاتون جج کا الزام ہے کہ انہوں نے تحقیقات کے التوا کے دوران متعلقہ ڈسٹرکٹ جج کے تبادلے کی درخواست کی تھی تاکہ حقائق کی غیر جانبدارانہ تحقیقات ممکن ہوسکے، لیکن ان کی درخواست مسترد کردی گئی۔