شاہ رخ خان کی 57 ویں سالگرہ ، فلم پٹھان کا ٹیزر جاری

 ممبئی ۔ بالی ووڈ کے رومانس کنگ شاہ رخ خان 2 نومبر کو 57 برس کے ہوگئے۔ شاہ رخ خان جہاں اپنی 57 ویں سالگرہ منا رہے تھے وہیں ان کی آنے والی فلم پٹھان کا ٹیزر جاری کردیاگیا ہے جوکہ ان کے مداحوں کیلئے اپنے اسٹار کی طرف سے سالگرہ کا تحفہ ثابت ہوا اور دیکھتے ہی دیکھتے چند منٹوں میں ٹیزر ملین ویوز کا ہندسہ عبور کرگیا۔

57 ویں سالگرہ پر بھی خان کے اسٹارڈم میں کسی بھی طرح کمی نظر نہیں آتی۔ اس کا ثبوت ایک بار پھر ان کے گھر کے باہر اس وقت ملا جب مداحوں نے ہمیشہ کی طرح انہیں سالگرہ کی مبارکباد دی۔ ان کی فلموں نے باکس آفس پرکئی ریکارڈ توڑے ۔شاہ رخ خان 5000 کروڑ کے مالک ہیں۔شاہ رخ خان منت سے باہر آئے تو مداح بہت خوش ہوئے۔ ان کی کئی ویڈیوز اور تصاویر سوشل میڈیا پر وائرل ہو رہی ہیں۔شاہ رخ نے ننھے ابراہم کے ساتھ مداحوں کی محبت کا جواب دیا۔ شاہ رخ خان چند منٹوں تک اپنے مداحوں کے سامنے جھکتے رہے اور بوسوں کے ذریعے انہیں پیار بھیجتے رہے۔ شاہ رخ خان کی یہ ویڈیو تیزی سے وائرل ہو رہی ہے اور مداحوں کی جانب سے اس پر مسلسل ردعمل کا اظہار کیا جا رہا ہے۔ شاہ رخ خان کے مداح ان کی سالگرہ کئی طریقوں سے مناتے ہیں۔ کچھ مداحوں نے اداکار کی سالگرہ ایک بار پھر دل والے دلہنیا لے جائیں گے دیکھ کر منائی۔ فلم کی نمائش کی ویڈیوز سوشل میڈیا پر وائرل ہو رہی ہیں۔یادرہے کہ کنگ خان باکس آفس پر اس وقت ایک بڑی ہٹ فلم کے انتظار میں ہیں کیونکہ ان کی پچھلی چند فلمیں ناکام ثابت ہوئی ہیں لیکن اب ان کی تین فلمیں پٹھان ، جوان اور ڈنگی قطار میں ہیں اور امید ہیکہ یہ فلمیں ان پر باکس آفس پر دھوم مچانے کا موقع دیں گی۔