ممبئی:بالی وڈ اداکارہ شردھا کپور کا کہنا ہے کہ فلم حسینہ پارکر میں کام کرنا ان کے لئے کافی چیلنجنگ رہا۔
شردھا اور ان کے بھائی سدھانت کپور کی فلم حسینہ پارکر 22 ستمبر کو ریلیز ہونے والی ہے ۔ اس فلم میں سدھانت انڈر ورلڈ ڈان داؤد جبکہ شردھا داؤد اس کی بہن حسینہ پارکر کا کردار ادا کررہی ہیں۔ فلم کے سلسلے میں شردھا کافی پرجوش ہیں۔ انہوں نے کہا کہ وہ پہلی بار کسی بایو پک میں کررہی ہیں۔
شردھا نے کہا کہ حسینہ پارکر کا کردار ادا کرنا بہت مشکل اور چیلنجنگ تھا۔ یہ کردار ایسا ہے جس میں کریکٹر پر کہانی لکھی گئی ہے ۔ ابھی تک جتنے بھی کردار فلموں میں ادا کئے گئے ہیں ان سے یہ کردار بالکل مختلف ہے ۔ اس لئے اس فلم کے سلسلے میں ایکسائٹمنٹ بھی زیادہ ہے ۔ کم عمر میں ایسے موقعے ملنا بڑی بات ہے ۔
انہوں نے کہا کہ عام آدمی کی زندگی میں زیادہ تر ایسی چیزیں نہیں ہوتیں کہ اپنے شوہر یا بھائی کو وہ کھو دے ۔ ان کو مار دیا جائے ۔ اس طرح کا نقصان عموماً نہیں ہوتا لیکن حسینہ کی زندگی میں یہ سب ہوا۔ اس فلم کی کہانی سچے واقعات پر مبنی ہے جس میں یہ سب شامل کیا گیا ہے ۔ یہ سب میرے لئے کافی حیران کن تھا۔
