خرطوم ؛سوڈان میں ڈیم منہدم ہونے سے 132افراد ہلاک ہو گئے ،جب کہ پانی کے ریلے نے 20 دیہات صفحہ ہستی سے مٹا دیے ۔خبررساں اداروں کے مطابق سوڈان کی ریاست مشرقی بحر احمر میں ارباط ڈیم منہدم ہو گیا جس کے نتیجے میں پانی قریبی دیہات میں داخل ہو گیا اور کئی لوگوں کو اپنے ساتھ بہا کر لے گیا۔ اقوام متحدہ کے مطابق ڈیم سے نکلنے والے پانی نے 20دیہات صفحہ ہستی سے مٹا دیے۔ ارباط ڈیم پھٹنے سے ہزاروں افراد بے گھر ہو گئے۔ سوڈان کی مرکزی وزارت صحت کا کہنا ہے کہ پھنسے ہوئے لوگوں کی مدد کے لیے علاقے میں محدود وسائل بروئے کار لائے جا رہے ہیں۔ بیان میں مزید کہا گیا کہ سیلاب میں ہلاکتوں اور لاپتا افراد کی حتمی تعداد بیان نہیں کی جاسکتی۔ ایک مقامی عہدے دار کا کہنا تھا کہ ہلاکتوں کی تعداد 200تک پہنچنے کا خدشہ ہے۔
