زبیر معاملے میں سپریم کورٹ کا یوپی پولیس کو حکم

نئی دہلی، 18 جولائی (یو این آئی) سپریم کورٹ نے پیر کو اتر پردیش پولیس کو حکم دیا کہ وہ فیکٹ چیکر اور آلٹ نیوز کے شریک بانی محمد زبیر کے خلاف درج پانچ ایف آئی آر میں سے کسی ایک کی بنیاد پر عدالت کی اجازت کے بغیر 20 جولائی تک کوئی کارروائی نہ کرے یہ عبوری حکم جسٹس ڈاکٹر ڈی وائی چندر چوڑ اور جسٹس اے ایس بوپنا کی ڈویژن بنچ نے دیا۔

سپریم کورٹ نے اتر پردیش حکومت کو نوٹس جاری کرتے ہوئے اپنا موقف پیش کرنے کو کہا ہے۔ بدھ کو مزید سماعت کے لیے معاملہ درج کر لیا۔
زبیر کی وکیل ورندا گروور نے کہا کہ ان کے موکل کو ہاتھرس لے جایا گیا ہے اور ہاتھرس کی عدالت میں کارروائی پر روک لگانے کی درخواست کرنے کے بعد، سپریم کورٹ نے زبیر کی درخواست سننے پر رضامندی ظاہر کی۔
محترمہ گروور نے استدلال کیا کہ ایف آئی آر کا مواد تقریباً یکساں تھا جو دہلی پولیس نے مبینہ طور پر ہندو دیوی دیوتاؤں کو گالی دینے کے ساتھ ساتھ بیرون ملک سے موصول ہونے والی مبینہ غیر مجاز رقم کے ٹویٹس کے معاملے میں درج کیا تھا۔