شام میں رواں ماہ آنے والے تباہ کن زلزلے میں اپنے خاندان سے محروم ہونے والی شیرخوار بچی بالآخر اپنے چچا اور خالہ سے مل گئیں۔ غیرملکی خبر ایجنسی ’رائٹرز‘ کے مطابق شام میں رواں ماہ آنے والے تباہ کن زلزلے میں زندہ بچ جانے والی شیرخوار بچی اپنے چچا اور خالہ سے مل گئی ہے کیونکہ اس کے والدین سمیت بھائی، بہن زلزلے میں جاں بحق ہوگئے تھے اور وہ اکیلی رہ گئی تھیں۔
زلزلے کے بعد سوشل میڈیا پر بڑے پیمانے پر گردش کرنے والی فوٹیج میں دکھایا گیا کہ ایک ریسکیو اہلکار ملبے کے ڈھیر کے نیچے گھس کر مٹی سے ڈھکے ایک بچی کو باہر لا رہے ہیں۔
بعدازاں اس بچے کی شناخت عبداللہ اور عفرا ملہینا کی بیٹی کے طور پر ہوئی جو صوبہ حلب میں باغیوں کے زیر قبضہ علاقے جنداریس میں اپنے دیگر بچوں سمیت آنے والے زلزلے میں جاں بحق ہوگئے تھے۔
