آسکر ایوارڈ یافتہ فلم ساز شرمین عبید چنائے کی سربراہی میں چلنے والی ان کی فلم اکیڈمی (ایس او سی) کی جانب سے لڑکیوں کی کم عمری میں شادی سے متعلق شعور اجاگر کرنے کے لیے مختصر ترین دورانیے کی اینیمیٹڈ فلم ’ستارہ‘ ریلیز کردی گئی۔
ایک منٹ سے بھی کم دورانیے کی اس اینیمیٹڈ آگاہی فلم سے قبل شرمین عبید چنائے اور اس کی اکیڈمی نے بچوں پر تشدد کے خاتمے اور ان کی حفاظت سے متعلق شعور اجاگر کرنے کے لیے شارٹ اینیمیٹڈ فلمیں ریلیز کی تھیں۔
بچوں سے متعلق شعور اجاگر کرتی فلموں سے قبل انہوں نے گزشتہ برس خواتین پر تشدد کے حوالے سے متعلق بھی آگاہی مہم کے سلسلے میں مختصر دورانیے کی فلمیں جاری کی تھیں۔
اب شرمین عبید چنائے فلم کمپنی کی جانب سے جاری کی گئی 46 سیکنڈ کی اینیمیٹڈ فلم کو عالمی فلم پروڈکشن اداروں کے ساتھ ریلیز کردیا گیا۔
