شام کے ساحلی علاقوں میں  تنازعے میں مرنے والوں کی تعداد 237 ہو ئی

 دمشق : شام کے ساحلی علاقوں میں جمعرات کو شروع ہونے والے فوجی تنازعے کے بعد سے اب تک کم از کم 237 افراد ہلاک ہو چکے ہیں۔ یہ اطلاع  جنگ پر نظر رکھنے والی تنظیم  ’سیرین آبزرویٹری فار ہیومن رائٹس‘ کی جانب سے جمعہ کو جاری کیے گئے اعداد و شمار سے حاصل کی گئی ہیں۔

تنظیم نے کہا کہ ہلاک ہونے والوں میں فوجی اہلکار، اپوزیشن کے جنگجو اور عام شہری شامل ہیں، کیونکہ حکومتی فورسز نےلاذقیہ، طرطوس اور حما کی گورنری میں سابق حکومت کے بچے ہوئے  فوجی دھڑوں پر اپنا جبر جاری رکھا ہوا ہے۔ آبزرویٹری نے کہا کہ جھڑپیں اس وقت شروع ہوئیں جب بندوق برداروں نے ساحل سمندر پر فوجی دستوں، چوکیوں اور ہیڈ کوارٹر پر گھات لگا کر حملہ کیا۔
آبزرویٹری کے مطابق، جمعرات سے اب تک ہلاکتوں کی تعداد بڑھ کر 237 ہو گئی ہے، جن میں 142 غیر لڑاکے بھی شامل ہیں، کیونکہ خطے میں پرتشدد جھڑپیں اور گھات لگا کر حملے جاری ہیں۔ ہلاک ہونے والوں میں شام کی وزارت دفاع اور داخلہ کے 50 فوجی اور افسران اور 45 اپوزیشن جنگجو شامل ہیں۔
آبزرویٹری نے اشارہ کیا کہ تنازع کے اہم مقامات پر اضافی فورسز اور بھاری ہتھیاروں کو تعینات کر دیا گیا ہے، کیونکہ لاذقیہ اور طرطوس کے دیہی علاقوں میں ابھی تک لڑائی جاری ہے۔ یہ جھڑپیں دسمبر 2024 میں پچھلی حکومت کے خاتمے کے بعد سب سے مہلک ہیں۔