پولس اہلکاروں کی شہادت یوگی حکومت کی ناکامی کا نتیجہ

نئی دہلی، 05 جولائی (یواین آئی) بہوجن سماج پارٹی کے رکن پارلیمنٹ کنور دانش علی نے کہا ہے کہ اترپردیش کی یوگی حکومت کی ناکامی کی وجہ سے کانپور میں آٹھ پولس اہلکاروں کی شہادت ہوگئی۔

امروہہ سے لوک سبھا رکن پارلیمنٹ مسٹر دانش علی نے ٹوئٹ کرکے اتوار کو اترپردیش حکومت کی کام کرنے کی پالیسیوں پر سوال کھڑاکیا ہے۔ انہوں نے بتایا کہ ’’کانپور میں شہید ہوئے ہمارے بہادر جوان اترپردیش حکومت کی غلط پالیسیوں کا نتیجہ ہے کہ خطرناک بدمعاش وکاس دوبے کھلا گھومتا رہا۔ حکومت کا پورا نظام صحافیوں، طالب علموں، حقوق انسانی کے کارکنوں اوراپنے فکری مخالفوں کو جھوٹے مقدموں میں جیل بھیجنے کا کام کرتا رہا اور جرائم پیشہ عناصر کھلے عام گھومتے رہے۔‘‘

واضح رہے کہ تین جولائی کی رات قتل کے معاملے میں مطلوب وکاس دوبے کو گرفتار کرنے گئی پولس کی ٹیم پر بدمعاشوں نے حملہ کردیا تھا۔ اس واقعہ میں ایک ڈپٹی سپرنٹنڈنٹ اور ایک تھانہ انچارج سمیت آٹھ جوان شہید ہوگئے تھے۔
واقعہ کے کچھ ہی گھنٹوں کے اندر پولس نے واردات میں ملوث وکاس کے دو رشتہ داروں کو مار گرایا تھا۔ دوبے کی تلاش میں پولس کی پچاس سے زیادہ ٹیمیں ریاست کے مختلف اضلاع میں تلاش کررہی ہیں۔ اس سلسلے میں پانچ سو سے زیادہ موبائل فون کو سروی لانس پر رکھا گیا ہے۔