آسٹریلیا سے تیسرا ٹی20، قومی ٹیم میں 2سے 3تبدیلیاں متوقع

پاکستان اور آسٹریلیا کے درمیان تیسرا ٹی20 میچ کل پرتھ میں کھیلا جائے گا جہاں ابتدائی دو میچوں میں ناکامی کے بعد تیسرے میچ میں پاکستانی ٹیم میں 2 سے 3تبدیلیاں متوقع ہیں۔

پاکستان اور آسٹریلیا کے درمیان پہلا ٹی20 میچ بارش کی نذر ہو گیا تھا اور باران رحمت نے پاکستان کو میچ میں یقینی شکست سے بچا لیا تھا۔

دوسرے ٹی20 میچ میں آسٹریلیا نے بابر اعظم اور افتحار احمد کی شاندار نصف سنچریوں کے باوجود پاکستان کو 7 وکٹوں سے شکست دے کر سیریز میں 0-1 کی برتری حاصل کر لی تھی۔

تیسرے ٹی20 میچ کے لیے دونوں ٹیمیں کینبرا سے پرتھ پہنچ چکی ہیں، جہاں قومی ٹیم نے ایک روز آرام کے بعد آج پریکٹس کی۔

ابتدائی دونوں میچوں میں قومی ٹیم کی بیٹنگ لائن بری طرح جدوجہد کرتی ہوئی نظر آئی اور بابر اعظم کے سوا کوئی بھی بلے باز آسٹریلین باؤلنگ کا سامنا نہ کر سکا۔

گزشتہ کچھ میچوں سے آؤٹ آف فارم فخر زمان کی مستقل ناقص کارکردگی کا سلسلہ جاری ہے اور ابتدائی دونوں میچوں میں وہ بالترتیب صفر اور دو رنز پر آؤٹ ہوئے۔

فخر زمان کی ناقص کارکردگی کا اندازہ اس بات سے لگایا جا سکتا ہے کہ تقریباً ڈیڑھ سال اور گزشتہ 12 میچوں کے دوران انہوں نے ایک بھی نصف سنچری اسکور نہیں کی۔

گزشتہ 12 ٹی20 میچوں میں فخر کا سب سے زیادہ اسکور 24 رنز تھا اور وہ کم و بیش تمام ہی میچوں میں ایک ہی طریقے سے وکٹ گنوا کر پویلین لوٹے۔

دوسری جانب جارح مزاج مڈل آرڈر بلے باز آصف علی بھی اپنے بلے سے بھی رنز نکلنے کا نام نہیں لے رہے اور گزشتہ سال جولائی میں ڈیبیو کرنے والے بلے باز نے اب تک انٹرنیشنل ٹی20 میں ایک بھی نصف سنچری اسکور نہیں کی۔

ڈومیسٹک کرکٹ میں رنز کا ڈھیر لگانے والے آصف علی کی ابتر کارکردگی کا اندازہ اس بات سے لگایا جا سکتا ہے کہ اب تک 25 ٹی20 میچوں میں وہ صرف 331 رنز بناسکے ہیں۔

اسی طرح حارث سہیل بھی ابتدائی دونوں میچوں میں کچھ کرنے میں ناکام رہے لیکن ٹیم مینجمنٹ نے انہیں ایک اور موقع دینے کا فیصلہ کیا ہے تاہم فخر زمان اور آصف علی کی اگلے میچ میں شمولیت غیریقینی ہے۔

ذرائع کے مطابق تیسرے ٹی20 میچ میں پاکستانی ٹیم میں فخر زمان کی جگہ امام الحق اور آصف علی کی جگہ نوجوان خوشدل شاہ کو ڈیبیو کرائے جانے کا امکان ہے۔

اسی طرح ابتدائی میچوں میں طویل القامت محمد عرفان کی خراب کارکردگی کے بعد ٹیم مینجمنٹ نے انہیں بھی تیسرے میچ سے ڈراپ کرنے کا فیصلہ کیا ہے اور عرفان کی جگہ محمد حسنین کو میچ میں موقع دیا جانے کا امکان ہے۔