گھر میں دھماکے سے تین مکانات زمین دوز، ملبے تلے دب جانے کے سبب لڑکی کی ہوئی موت

بہرائچ: جھالا گرام میں گھر میں کھانا پکاتے ہوئے سلنڈر پھٹ گیا، جس کی وجہ سے آس پاس کے تین مکانات مکمل طور پر تباہ ہوگئے۔ ملبے تلے دبے ہونے کے سبب ایک لڑکی جاں بحق ہو گئی جبکہ دو بچیاں زخمی ہو گئیں۔ زخمیوں کو اسپتال میں داخل کرایا گیا ہے۔

موتی پور تھانہ علاقہ کے گرام پنچایت جھالا کے رہنے والے شبیر کی 16 سالہ بیٹی نشا گھر میں گیس کے چولہے پر کھانا پکا رہی تھی۔ اس کے بعد سلنڈر میں زبردست دھماکہ ہوا۔ دھماکے سے شبیر اور پڑوسیوں شفیق اور جلیل کے گھر مکمل طور پر ملبے میں تبدیل ہو گئے۔ دھماکے میں نشا جاں بحق ہو گئی جب کہ شفیق کی دو بیٹیاں زخمی ہوئیں۔

متوفی کی ایک ٹانگ ملی ہے۔ ان کے جسم کا دوسرا حصہ ملبے تلے دبے ہونے کا خدشہ ہے۔ پکے مکان کے ملبے تلے دیگر افراد کے دبے ہونے کا شبہ ہے۔ پولیس نے تفتیش شروع کر دی ہے. زخمیوں کو اسپتال میں داخل کرایا گیا ہے۔ اس معاملے میں انچارج انسپکٹر مکیش کمار سنگھ نے بتایا کہ حادثہ سلنڈر پھٹنے سے ہوا۔

ایس ڈی ایم نے سی او کے ساتھ مل کر موقع کی جانچ کی۔
واقعہ کی اطلاع ملتے ہی ڈپٹی کلکٹر گیان پرکاش ترپاٹھی اور سرکل آفیسر نانپارہ راہل پانڈے نے موقع پر پہنچ کر معائنہ کیا۔