نیو یارک سے ٹوکیو تک سفر صرف ایک گھنٹے میں ممکن

ہیوسٹن: جدید ترین طیارے کے ذریعے نیو یارک سے ٹوکیو تک کا سفر صرف ایک گھنٹے میں ممکن ہوگیا۔امریکا میں ایک ایرو اسپیس اسٹارٹ اپ نے اپنے نئے ہائپر سونک طیارے کی پہلی جھلک متعارف کرا دی ہے، اس سلسلے میں کمپنی نے دعویٰ کیا ہے کہ یہ طیارہ مسافروں کو نیویارک سے ٹوکیو ایک گھنٹے میں پہنچا سکے گا۔

اتنے کم وقت میں طویل سفر کرنے کے لیے طیارہ مسافروں کو خلا کے کنارے تک لے کر جائے گا۔

وینس ایرو اسپیس کمپنی کی جانب سے بنایا گیا اسٹار گریزر نامی یہ طیارہ 11 ہزار 113 کلو میٹر فی گھنٹہ کی رفتار سے سفر کر سکے گا جس کو انڈسٹری میں ماک 9 کہا جاتا ہے۔ طیارے کو یہ طاقت روٹیٹنگ ڈیٹونیشن انجن سے ملتی ہے جو فی سیکنڈ 20 ہزار بار گھومتا ہے لیکن اس کو ٹیک آف کے لیے روایتی انجن ہی کی ضرورت ہوگی۔

اس طیارے کی لمبائی 100 فِٹ اور چوڑائی 150 فِٹ ہوگی جب کہ اس کا وزن 68 ہزار کلو گرام سے تھوڑا زیادہ ہوگا۔ اس میں 12 مسافروں کے سفر کرنے کی گنجائش ہوگی۔