امریکی صدر ڈونالڈ ٹرمپ اور ان کی اہلیہ میلانیا کورونا کی زد میں ، دونوں کوارنٹائن ہوئے

امریکی صدر ڈونالڈ ٹرمپ اور ان کی اہلیہ میلانیا ٹرمپ کورونا پازیٹیو پائے گئے ہیں ۔ دونوں وہائٹ ہاوس میں ہی کوارنٹائن ہوگئے ہیں ۔ جمعرات کو ٹرمپ کی سینئر ایڈوائزر ہوپ ہکس کورونا وائرس سے متاثر پائی گئی تھیں ۔ گزشتہ دنوں ہوپ ہکس ، صدر ٹرمپ کے ساتھ کئی سفر پر گئی تھیں ، جس کے بعد صدر ٹرمپ اور ان کی اہلیہ کا بھی کورونا ٹیسٹ کروایا گیا تھا ۔ جمعہ کو اس کی رپورٹ پازیٹیو آئی ہے ۔

سی این این نیوز کے مطابق ہوپ ہکس امریکی صدر ٹرمپ کی انتخابی مہم میں بھی اہم کردار ادا کررہی تھیں اور مسلسل کچھ ہفتوں سے صدر کے ساتھ ان کے طیارہ ائیرفورس ون میں بھی سفر کررہی تھیں ۔ ہوپ ہکس کے کورونا پازیٹیو ہونے کی خبر سامنے آنے کے بعد ٹرمپ سیلف آئیسولیٹ ہوگئے تھے اور ٹیسٹ کروایا تھا ۔
فاکس نیوز سے بات چیت کرتے ہوئے امریکی صدر ٹرمپ نے کہا تھا کہ ہاں ہوپ ہکس کورونا پازیٹیو پائی گئی ہیں ، مجھے صرف ابھی اس کی جانکاری ملی ہے ۔ وہ کافی زیادہ محنتی خاتون ہیں ۔ وہ اکثر ماسک پہنے نظر آتی تھیں ، لیکن پھر بھی پازیٹیو پائی گئی ہیں ۔ میں بھی جلد ہی ٹیسٹ کراوں گا ، ہم نے گزشتہ دنوں کافی وقت ساتھ میں گزارا ہے ۔ میلانیا نے بھی ٹیسٹ کرایا ہے ۔ اگر ہمیں کوارنٹائن ہونے کیلئے کہا گیا تو ہم ایسا ضرور کریں گے ۔ ابھی اس سلسلہ میں کچھ بھی واضح طور پر نہیں کہا جاسکتا ہے ۔