ڈبلیو ایچ او نے کورونا وائرس کے مریضوں پرایچ سی کیو ٹسٹ پر پابندی لگائی

جنیوا / نئی دہلی 26 مئی (یواین آئی) عالمی ادارہ صحت (ڈبلیو ایچ او) نے کورونا وائرس ‘كووڈ -19’ کے مریضوں پر ہائيڈروكسيكلوروكوئن (ایچ سي كيو) ادویہ کے تجربہ پرعارضی طور پر پابندی لگادی ہے۔

ڈبلیو ایچ او کے ڈائرکٹر جنرل ڈاکٹر ٹیڈروس گیبريسس نے پیر کو بتایا کہ تنظیم کے زیرانتظام 17 ممالک کے چار سو اسپتالوں میں كووڈ -19 کے مریضوں پر شروع کئے گئے’سالیڈریٹی ٹرائل‘کے ایگزیکٹیو گروپ کی سفارش پر یہ فیصلہ کیا گیا۔
ممتاز ہیلتھ میگزین ’لینسیٹ‘ میں گزشتہ جمعہ کو شائع ایک رپورٹ میں بتایا گیا تھا کہ سالیڈریٹی ٹرائل کے تحت جن مریضوں کو یہ دوا انفرادی طور پر یا مائیكرولائیڈ اینٹی بايوٹک کے ساتھ دی گئی تھی ان میں موت کی شرح زیادہ پائی گئی ہے۔