سعودیوں کو سوگوار چھوڑ کر جانے والی بچی “دانہ” کون ہے ؟

سعودی عرب میں Snap Chat کی مشہور شخصیت کے طور پر جانی جانے والی بچی “دانہ القحطانی” کی وفات کے اعلان کے بعد سوشل میڈیا کے حلقوں میں غم کی لہر دوڑ گئی۔ دانہ کے والد نے پیر کے روز بتایا کہ ان کی بیٹی حرکت قلب کے اچانک بند ہونے کے سبب فوت ہو گئی۔ دانہ القحطانی سعودی بچی غناتی القحطانی کی بہن ہے۔

سوشل میڈیا پر سرگرم افراد نے دانہ کی وفات پر ” #وفاه_دانه_القحطاني ” کا ٹرینڈ چلایا۔ چند گھنٹوں کے اندر اس ٹرینڈ پر 3.5 لاکھ تعزیتی ٹویٹس آ چکی تھیں۔ اس سے دانہ کی مقبولیت کا واضح اندازہ ہوتا ہے۔

دانہ القحطانی تین مشہور بہنوں “غناتی ، دنا اور دانہ” میں سب سے چھوٹی تھی۔ ان تینوں بچیوں نے گزشتہ دو برسوں کے دوران اپنے والد مشعل القحطانی کے ساتھ بڑی مقبولیت حاصل کی۔ یہ تینوں بچیاں اپنے والد کے ساتھ ناظرین کے لیے روزانہ کی زندگی کے خوب صورت لمحات پیش کرتی تھیں۔

دانہ کی وفات سے ایک گھنٹہ قبل بنایا جانے والا ایک وڈیو کلپ بھی منظر عام پر آیا ہے۔ کلپ میں دانہ کے والد نے اس کو گھر میں آرام کرنے کے لیے کہا اور جب وہ واپس آیا تو دانہ اس دنیا سے رخصت ہو چکی تھی۔