پرشانت کی بیوی پہنچی سپریم کورٹ ،منگل کو سماعت

نئی دہلی،10جون؛اترپردیش کے وزیراعلی یوگی آدتیہ ناتھ کے خلاف مبینہ طورپر قابل اعتراض تبصروں کے سلسلے میں گرفتار کئےگئے پرشانت قنوجیا کی بیوی جگیشا اروڑا نے اپنے شوہر کی رہائی کےلئے سپریم کورٹ میں اپیل دائرکی ہے،جس پر کل سماعت ہوگی۔

عرضی گزار کی جانب سے وکیل نتیا رام کرشن نے جسٹس اندرا بینرجی اور جسٹس اجے رستوگی کی تعطیلی بینچ کے سامنے معاملے کا خصوصی ذکر کیا ہےاورعدالت سے فوری طورپر سماعت کی اپیل کی ہے۔عدالت عرضی پر سماعت کو تیار ہوگئی اور اس کےلئے کل کی تاریخ مقرر کی ہے۔

محترمہ اروڑا نے اپیل دائر کرکے اپنے شوہر کی رہائی کا مطالبہ کیا ہے۔
یوگی آدتیہ ناتھ کے ساتھ اپنے تعلقات ہونے کا دعوی کرنے والی ایک خاتون کے بارے میں شائع اخبار کو مذاحیہ تبصرے کے ساتھ ٹیویٹر پر جمعرات کو شیئر کرنے کے الزام میں پرشانت قنوجیا کو اترپردیش پولیس نے ہفتے کو دہلی کے مغربی ونود نگر میں واقع ان کےگھر سے گرفتار کرلیا تھا۔
اترپردیش پولیس نے معاملے کا از خود نوٹس لیتے وہئے لکھنؤ کے حضرت گنج پولیس اسٹیشن میں ایک ایف آئی آر درج کی ہے،جس میں کہاگیا ہے کہ پرشانت قنوجیا نے ٹویٹر کے ذریعہ قابل اعتراض پوسٹ کرکے وزیراعلی یوگی آدتیہ ناتھ کی شبیہ خراب کرنے کی کوشش کی ہے۔

عرضی گزار نے اپنے شوہر کی گرفتاری کو غیر قانونی اور یک طرفہ قرار دیتے ہوئے ان کی رہائی کا مطالبہ کیاہے۔