اس وقت خواتین مردوں سے زیادہ طاقتور ہیں: اکشے کمار

بولی وڈ کھلاڑی اکشے کمار جو ان دنوں اپنی آنے والی اسپیس سائنس فلم ’مشن منگل‘ کی تشہیر میں مصروف ہیں، انہوں نے تسلیم کیا ہے کہ اس وقت مرد حضرات سے زیادہ خواتین طاقتور ہیں۔

جہاں اکشے کمار نے اب مردوں کے مقابلے خواتین کو زیادہ طاقتور اور بہادر تسلیم کیا ہے، وہیں انہیں اس بات پر سخت غصہ ہے کہ ان کی فلم ’مشن منگل‘ کو خواتین پر مبنی فلم کہا جا رہا ہے۔

دلچسپ بات یہ ہے کہ ’مشن منگل‘ میں اکشے کمار کے ساتھ ودیا بالن، سوناکشی سنہا، تاپسی پنو، کرتی کلہاری اور نتھیا مینن جیسی اداکارائیں بھی مرکزی کردار میں دکھائی دیں گی۔

’مشن منگل‘ دراصل بھارتی خلائی تحقیقاتی ادارے ’انڈین اسپیس ریسرچ آرگنائیزیشن‘ (اسرو) میں کام کرنے والی 5 سائنس دان خواتین کی کاوشوں پر مبنی فلم ہے، تاہم اکشے کمار اس بات پر بضد ہیں کہ اس فلم کو خواتین پر مبنی فلم قرار نہ دیا جائے۔

ساتھ ہی دوسری جانب انہوں نے اس بات کا بھی اعتراف کیا ہے کہ اس وقت خواتین مردوں کے مقابلے زیادہ طاقتور، بہادر اور اچھے کام کرنے میں مصروف ہیں۔

نیوز 18 کے مطابق ’مشن منگل‘ کی تشہیر کے دوران ایک تقریب میں اکشے کمار کا کہنا تھا کہ اس وقت بھارتی خواتین گھر کی معیشت چلانے سمیت ملک کی معیشت چلا رہی ہیں۔