دنیا کی تیز ترین لفٹ: چین میں قائم نیا ریکارڈ، چند سیکنڈز میں سینکڑوں میٹر کا سفر

گوانگزو :جدید دور میں جہاں انسان وقت کی بچت اور سہولت کو سب سے زیادہ اہمیت دیتا ہے، وہیں بلند و بالا عمارتوں میں لفٹس روزمرہ زندگی کا لازمی حصہ بن چکی ہیں، کیا آپ جانتے ہیں کہ دنیا کی سب سے تیز ترین لفٹ کہاں موجود ہے اور یہ کس رفتار سے مسافروں کو منزل تک پہنچاتی ہے؟ گنیز ورلڈ ریکارڈز کے مطابق دنیا کی تیز ترین لفٹ چین کے شہر گوانگزو میں واقع سی ٹی ایف فنانس سینٹر میں نصب کی گئی ہے، جس نے رفتار کے میدان میں ایک نیا عالمی ریکارڈ قائم کیا ہے۔

یہ انتہائی جدید لفٹ جاپانی ٹیکنالوجی کمپنی ہیٹاچی (Hitachi) نے تیار کی ہے، جو اپنی غیر معمولی رفتار اور جدید حفاظتی نظام کی وجہ سے دنیا بھر میں توجہ کا مرکز بنی ہوئی ہے، اس لفٹ کی رفتار تقریباً 1,260 میٹر فی منٹ ریکارڈ کی گئی ہے، جو کہ تقریباً 75.6 کلومیٹر فی گھنٹہ کے برابر بنتی ہے۔ یہ رفتار ایک عام شہری کار کے مساوی سمجھی جاتی ہے جو اسے دنیا کی عام لفٹوں سے کئی گنا زیادہ تیز بناتی ہے۔

سی ٹی ایف فنانس سینٹر میں نصب یہ لفٹ تقریباً 440 میٹر کی بلندی تک جاتی ہے اور چند ہی سیکنڈز میں مسافروں کو نچلی منزل سے بالائی منزل تک پہنچا دیتی ہے، اس تیز رفتار لفٹ کے لیے خصوصی ایروڈائنامک ڈیزائن، جدید موٹر سسٹم اور دباؤ کو متوازن رکھنے والی ٹیکنالوجی استعمال کی گئی ہے تاکہ مسافروں کو سفر کے دوران کسی قسم کی تکلیف محسوس نہ ہو۔

گنیز ورلڈ ریکارڈز نے اس لفٹ کو دنیا کی تیز ترین لفٹ قرار دیتے ہوئے باضابطہ طور پر ریکارڈ میں شامل کیا ہے، مستقبل میں شہروں میں بلند عمارتوں کی تعداد میں اضافے کے ساتھ اس طرح کی تیز رفتار اور محفوظ لفٹس کی مانگ مزید بڑھے گی۔