زیڈ ٹی ای نے اب تک کا سب سے سستا فولڈ ایبل فون پیش کردیا

چینی اسمارٹ موبائل فون کمپنی ’زیڈ ٹی اِی‘ نے اب تک کا سب سے سستا فولڈ ایبل فون متعارف کرادیا۔ عام طور پر فولڈ ایبل فونز کی قیمت پاکستانی ڈھائی سے تین لاکھ روپے کے درمیان ہوتی ہے، تاہم بعض فونز کی قیمت ساڑھے تین لاکھ روپے تک بھی جا پہنچتی ہے۔

تاہم ’زیڈ ٹی اِی‘ نے دیگر کمپنیوں کے مقابلے انتہائی سستا فولڈ ایبل فون متعارف کرادیا، جسے جاپان میں فروخت سے قبل آن لائن خریدنے پر مزید رعایت بھی دینے کا اعلان کردیا گیا۔

کمپنی نے ’زیڈ ٹی اِی: لبیرو فلپ‘ کو متعارف کراتے ہوئے اس کی جاپان میں پری آرڈر بکنگ پر تقریبا 50 فیصد رعایت کا بھی اعلان کردیا۔

فون کو 7-6 انچ اسکرین، اینڈرائیڈ 13 کے آپریٹنگ سسٹم جب کہ 6 جی بی ریم اور 128 جی بی میموری کے ساتھ متعارف کرایا گیا ہے۔

’زیڈ ٹی اِی: لبیرو فلپ‘ کے بیک پر دو کیمرے دیے گئے ہیں، جس میں سے مین کیمرا 50 میگا پکسل جب کہ دوسرا 2 میگا پکسل کا ہے۔

اسی طرح فون کے فرنٹ پر ہول پنچ کے ساتھ 16 میگا پکسل سیلفی کیمرا دیا گیا ہے۔

فولڈ ایبل فون کو 4300 ایم اے ایچ بیٹری اور 33 واٹ کے فاسٹ چارجر سمیت فنگر پرنٹ سینسر اور دیگر سیکیورٹی فیچرز کے ساتھ متعارف کرایا گیا ہے۔

کمپنی نے فون کی مجموعی قیمت ایک لاکھ 17 ہزار روپے رکھی ہے، تاہم مختلف ممالک میں اسے فروخت کے لیے پیش کرتے وقت اس میں مزید کمی کرنے کا امکان ہے۔

’زیڈ ٹی اِی: لبیرو فلپ‘ کو جلد ہی پاکستان سمیت خطے کے دیگر ممالک میں بھی پیش کیا جائے گا اور ممکنہ طور پر پاکستان میں اس کی قیمت کم کرکے ایک لاکھ روپے تک کردی جائے گی۔