مصنوعی ذہانت کے ایجنٹس بھی صنفی امتیاز کا شکار، خواتین اے آئی بوٹس کو 10 فیصد کم معاوضہ

ایک نئی تحقیق میں انکشاف ہوا ہے کہ ملازمت کی جگہ پر پایا جانے والا صنفی امتیاز اب مصنوعی ذہانت کے ایجنٹس تک بھی پھیل سکتا ہے، جہاں ایک ہی نوعیت کا کام انجام دینے کے باوجود خواتین کے طور پر پیش کیے جانے والے اے آئی ایجنٹس کو مرد اے آئی ایجنٹس کے مقابلے میں کم معاوضہ دیا جاتا ہے۔

یونیورسٹی آف لِمرِک میں ہونے والی تحقیق کے دوران سائنس دانوں نے مصنوعی ذہانت کے ایجنٹس کے ساتھ انسانی رویوں کا جائزہ لیا۔ تحقیق کے لیے ایک ورچوئل ریئلٹی دفتر کا ماحول تیار کیا گیا، جہاں انسانوں کو اے آئی ایجنٹس کے ساتھ کام کرنے اور انہیں مختلف کاموں کے عوض معاوضہ دینے کا موقع فراہم کیا گیا۔

تحقیق کے نتائج میں معلوم ہوا کہ ورچوئل دفتر میں کام کرنے والے انسانوں نے مرد اے آئی ایجنٹس کو خواتین اے آئی ایجنٹس کے مقابلے میں زیادہ معاوضہ ادا کیا۔ حیران کن طور پر دونوں طرح کے اے آئی ایجنٹس کی بنیادی ٹیکنالوجی ایک جیسی تھی اور وہ ایک ہی نوعیت کے کام انجام دے رہے تھے، صرف صنفی شناخت یا پیش کش میں فرق کی بنیاد پر معاوضے میں واضح فرق سامنے آیا۔

تحقیق کے مطابق خواتین اے آئی ایجنٹس کو ایک جیسا کام مکمل کرنے کے باوجود مرد اے آئی ایجنٹس کے مقابلے میں تقریباً 10 فیصد کم معاوضہ دیا گیا۔ محققین کے مطابق یہ نتیجہ اس بات کی نشاندہی کرتا ہے کہ انسانی معاشرے میں موجود صنفی تعصبات اور رویے مصنوعی ذہانت کے ساتھ تعامل کے دوران بھی ظاہر ہوسکتے ہیں۔

تحقیق کی شریک مصنفہ ڈاکٹر میری ہاؤسفیلڈ نے کہا کہ سب سے زیادہ تشویش ناک بات یہ ہے کہ ان اے آئی ایجنٹس کے پیچھے بنیادی ٹیکنالوجی ایک ہی تھی لیکن انسانوں نے ان کے ساتھ یکساں برتاؤ نہیں کیا،اس تجربے نے یہ سوال اٹھایا ہے کہ کیا مصنوعی ذہانت کے ساتھ انسانی تعامل بھی معاشرے میں پہلے سے موجود تعصبات کو دوبارہ پیدا کرسکتا ہے۔

ڈاکٹر میری ہاؤسفیلڈ نے کہا کہ لوگ عموماً مصنوعی ذہانت کو غیر جانب دار سمجھتے ہیں، تاہم حقیقت یہ ہے کہ جس انداز میں اے آئی نظاموں کو ڈیزائن کیا جاتا ہے اور انہیں صارفین کے سامنے پیش کیا جاتا ہے، اس سے ایسے خیالات اور تعصبات عملی شکل اختیار کرسکتے ہیں جو انسانوں کے باہمی رابطوں میں پہلے سے موجود ہوتے ہیں۔

محققین کے مطابق مصنوعی ذہانت کے نظام روزمرہ زندگی، دفاتر، کاروباری اداروں اور مختلف پیشہ ورانہ شعبوں میں تیزی سے شامل ہورہے ہیں۔ ایسے میں یہ سمجھنا ضروری ہے کہ انسان اے آئی ایجنٹس کے ساتھ کس بنیاد پر فیصلے کرتے ہیں اور آیا ان فیصلوں میں سماجی تعصبات بھی اثر انداز ہورہے ہیں۔

تحقیق کے نتائج اس پہلو کی جانب بھی توجہ دلاتے ہیں کہ مستقبل میں اگر اے آئی ایجنٹس کو بھرتی، کام کی تقسیم، معاوضے کے تعین یا دیگر پیشہ ورانہ ذمہ داریوں میں استعمال کیا گیا تو انسانوں کے ان ایجنٹس کے بارے میں تصورات اور ان کی ظاہری شناخت فیصلوں پر اثر انداز ہوسکتی ہے۔