ممبئی، 17 جولائی (یو این آئی) ہندی فلمی دنیا میں اپنی اداکاری سے لوگوں کو دیوانہ بنانے والے اداکار تو بہت ہوئے اور سامعین نے انہیں اسٹار بھی مانا لیکن ستر کی دہائی میں راجیش کھنہ پہلے ایسے اداکار کے طور پر سامنے آئے جن کو سامعین نے سپر اسٹار کا خطاب دیا تھا۔
راجیش کھنہ کو بالی وڈ کا پہلا سپر اسٹار کہا جاتا ہے۔
18 جولائی برسی کے موقع پر ..
جتن کھنہ عرف راجیش کھنہ29 دسمبر 1942 کوپنجاب کے امرتسر میں پیدا ہوئے تھے۔
بچپن سے ہی ان کا رجحان فلموں کی جانب تھا اور وہ اداکار بننا چاہتے تھے حالانکہ ان کے والد اس بات کے سخت خلاف تھے۔
راجیش کھنہ اپنے کیریئر کے ابتدائی دور میں تھیٹر سے منسلک ہوئے اور بعد میں یونائیٹڈ پروڈیوسر ایسوسی ایشن کی طرف سے منعقد آل انڈیا ٹیلنٹ مقابلہ میں حصہ لیا اور وہ سرفہرست رہے۔
ان کے کرئیر کا آغاز 1966 میں چیتن آنند کی فلم ’آخری خط‘ سے ہوا لیکن 1969 میں ’آرادھنا‘ کی ریلیز کے بعد وہ راتوں رات سٹار بن گئے۔
پروڈیوسر و ڈائریکٹر شکتی سامنت کی گولڈن جوبلی فلم ’آرادھنا‘ میں انھوں نے باپ اور بیٹے کا ڈبل رول نبھایا تھا اور ان کا وہ سر کو ایک خاص انداز میں جھٹکنا، منفرد چال، غمگین آنکھیں اور مخصوص ادائیں شائقین کے دلوں میں اتر گئیں۔
اس کے بعد انہوں نے لگاتار 15 ہٹ فلمیں دے کر کامیابی کا ایسا ریکارڈ قائم کیا جو اب تک نہیں ٹوٹ سکا ہے۔
