افغانستان سے 353 افراد کو لے کر طیارہ دوحہ کیلئے روانہ

کابل ، 18 اکتوبر ؛افغانستان سے امریکی فوجیوں کے مکمل انخلا کے بعد 350 سے زائد افراد کو لے جانے والی نویں انخلا کی پرواز نے دارالحکومت کابل کوچھوڑ دیا ۔ایک سینئر قطری عہدیدار نے سی این این کو یہ اطلاع دی ۔

طیارہ اتوار کو لوگوں کو لے کر قطر کے دارالحکومت دوحہ کے لیے کابل سے روانہ ہوا۔ افغانستان کی امریکن یونیورسٹی کے اساتذہ ، عملہ اور طلبا سمیت 353 افراد مسافروں میں شامل تھے ، جو افغانستان سے لوگوں کو لے جانے والے سب سے بڑے طیارے میں سوار تھے۔

عہدیدار نے کہا کہ یہ ابھی تک واضح نہیں ہے کہ طیارے میں کتنے امریکی تھے۔ افغانستان ، نیدرلینڈز ، ڈنمارک اور آسٹریلیا کے شہری بھی روانہ ہونے والوں میں شامل تھے۔
یہ لوگ اپنی آخری منزل تک روانگی تک دوحہ میں رہیں گے۔

امریکی میڈیا نے رواں ماہ کے شروع میں اطلاع دی تھی کہ امریکہ کا ارادہ ہے کہ اس سال کے آخر تک افغانستان سے انخلا کی پروازیں دوبارہ شروع کی جائیں۔ جب تک یہ شروع نہیں ہوتا ، امریکی محکمہ خارجہ افغانستان سے قطر کے لیے پروازوں کا بندوبست کرے گا۔