سعودی عرب، مکمل حجاب میں گانا گاتی خاتون تنقید کی زد میں

سعودی عرب کے عوام کی جانب سے مکمل حجاب میں گانا گاتی خاتون پر کڑی تنقید کی جا رہی ہے۔

سعودی اداکار عبداللّٰہ السدحان کی جانب سے ایک نقاب پوش خاتون کی گانا گاتے ہوئے ویڈیو اپنے ٹوئٹر اکاؤنٹ پر شیئر کی گئی۔

اداکار کا اپنے ٹوئٹ میں اس خاتون کی آواز کی تعریف کرتے ہوئے لکھنا تھا کہ میں صرف یہ کہنا چاہتا ہوں کہ خدا آپ کی حفاظت کرے، زندگی گزارنے کے لیے کام کی تلاش اور پیسہ کمانا مشکل ہے، آپ کی آواز خوبصورت ہے، آپ کو گاتے رہنا چاہیے۔

ما اقول الا الله يحفظك وبس .
البحث عن الرزق صعب استمري صوتك جميل بغض النظر عن المقامات 🌹 pic.twitter.com/1LgVx32b5C

— عبدالله السدحان (@Abdulsadhan) August 16, 2022

اس ویڈیو کا سعودی میڈیا پر وائرل ہونا ہی تھا کہ اس باپردہ خاتون پر صارفین کی سوشل میڈیا جانب سے کڑی تنقید کی جانے لگی۔ اس ویڈیو پر کئی سعودی شہریوں نے ناپسندیدگی کا اظہار کیا۔

ایک صارف کا لکھنا تھا کہ اللّٰہ سے ڈرو، گانا گانا اور بجانا مذہبی طور پر ناجائز ہے، روزی ایسے پیشے سے کماؤ کے سب کو آپ پر فخر ہو۔

ایک اور صارف کا کہنا تھا کہ اگر اس عورت نے موسیقی کو اپنایا ہے تو یہ پردہ کیوں کر رہی ہے، یہ گانا گاتے ہوئے پردہ اتار دیتی، پردے میں گانا گانا حجاب کی توہین ہے۔

دوسری جانب کچھ صارفین کا اس باپردہ خاتون کی حمایت میں کہنا تھا کہ یہ خاتون ایک فنکار ہے، اس کی آواز گانے کے لیے خوبصورت اور بالکل درست ہے۔

ایک اور صارف کا خاتون کے حق میں کیے گئے ٹوئٹ میں کہنا تھا کہ فن کا مظاہرہ کرنے کے لیے نقاب اس خاتون کے لیے رکاوٹ نہیں بنا اور نہ ہی اِس نے اپنے ٹیلنٹ کو روکا ہے، اس خاتون کو معلوم ہے کہ چہرہ ڈھانپنے سے اس کے فن پر کوئی اثر نہیں پڑے گا۔