اکیس سال تک کباڑ کا کام کرنے والا شخص اچانک کروڑ پتی بن گیا

چین میں 21 سال تک کباڑ اکٹھا کرکے گزر بسر کرنے والے 71 سالہ شخص کی قسمت اس وقت بدل گئی جب اسے معلوم ہوا کہ اس کے پنشن کھاتے میں 4 لاکھ 24 ہزار

204 یوان جمع ہیں۔

غیر ملکی خبر رساں ویب سائٹ کی رپورٹ کے مطابق صوبہ ہونان کے علاقے چنگڈو

یں رہائش پذیر ریو کو ستمبر 2026 کے اختتام پر ایک بینک کارڈ موصول ہوا جو اس کے پنشن کھاتے سے منسلک تھا۔ بینک کارڈ ملنے کے بعد اسے اپنے کھاتے میں موجود رقم کا علم ہوا تو وہ خود بھی حیران رہ گیا۔

بین الاقوامی ذرائع ابلاغ کی رپورٹس کے مطابق ریو کے کھاتے میں موجود رقم 4 لاکھ 24 ہزار 204 یوان تھی، جو پاکستانی کرنسی میں 1 کروڑ 73 لاکھ روپے سے زائد بنتی ہے۔ ریو کو اس سے قبل یہ معلوم ہی نہیں تھا کہ حکومت کی جانب سے اس کے لیے باقاعدگی سے پنشن جمع کی جا رہی ہے۔

حکام کے مطابق ریو 2015 میں ریٹائرمنٹ کی عمر کو پہنچ گیا تھا اور اس کی ماہانہ پنشن 3700 یوان مقرر کی گئی تھی۔ گزشتہ 10 برس سے زائد عرصے کے دوران اس کی پنشن جمع ہوتی رہی اور رقم بڑھتے بڑھتے 4 لاکھ 20 ہزار یوان سے تجاوز کرگئی۔

ریو کا کہنا ہے کہ اس نے کبھی تصور بھی نہیں کیا تھا کہ اس کے ساتھ ایسا ہوگا۔ اس نے حکام کی جانب سے فراہم کی جانے والی مدد پر اظہار تشکر بھی کیا۔

ریو گزشتہ 21 برس سے کباڑ جمع کرکے اپنی زندگی کا پہیہ چلا رہا تھا۔ 2000 کی دہائی میں اسے حکومت کے زیرانتظام ایک دکان سے معاوضہ دے کر ملازمت سے فارغ کیا گیا تھا، جہاں وہ تقریباً 30 برس تک کام کرچکا تھا۔

ملازمت ختم ہونے کے بعد ملنے والی رقم زیادہ عرصہ اس کا ساتھ نہ دے سکی اور وہ قرضوں میں گھر گیا۔ مالی مشکلات کے ساتھ رشتے داروں سے اختلافات بھی بڑھتے گئے، جس کے بعد اس نے کباڑ جمع کرنے کا کام شروع کردیا اور بعد ازاں چنگڈو منتقل ہوگیا۔

ریو کی حالت کا اندازہ اس بات سے بھی لگایا جاسکتا ہے کہ اس کے پاس موبائل فون تک نہیں تھا، اسی وجہ سے اسے اپنی پنشن کے بارے میں بھی کوئی اطلاع نہیں مل سکی اور برسوں تک پنشن کی رقم اس کے کھاتے میں جمع ہوتی رہی۔

2024 کی سردیوں میں مقامی انتظامیہ کے اہلکاروں نے ریو کو ایک خستہ حال عمارت میں رہتے ہوئے دیکھا۔ حکام نے اسے سرکاری پناہ گاہ منتقل ہونے کی پیشکش کی، تاہم اس نے ابتدا میں یہ تجویز قبول نہیں کی۔

بعد ازاں انتظامیہ کی جانب سے اسے وقتاً فوقتاً روزمرہ استعمال کی اشیا فراہم کی جاتی رہیں، جس کے نتیجے میں ریو کا سرکاری اداروں پر اعتماد بڑھا اور بالآخر وہ پناہ گاہ منتقل ہونے پر رضامند ہوگیا۔ اسی دوران اس نے حکام کو اپنی ذاتی معلومات بھی فراہم کیں، جس سے اس کی پنشن سے متعلق تفصیلات سامنے آئیں۔

اب ریو نے اپنی جمع شدہ پنشن کی رقم کے ذریعے چنگڈو میں ایک فلیٹ کرائے پر لینے کا منصوبہ بنایا ہے، جہاں وہ آئندہ زندگی نسبتاً بہتر حالات میں گزارنے کا خواہاں ہے۔