ہالینڈ کوشوٹ کر کے ارجنٹینا فائنل میں

سائوپائولو۔برازیل میں 2014 کے فٹبال ورلڈ کپ میں ارجنٹینا نے ہالینڈ کو دو کے مقابلے میں چارگول سے شکست دے کر 24 برس بعد فائنل میں جگہ بنا لی ہے۔تیرہ جولائی کو ریو ڈی جنیرو کے ماراکانا اسٹیڈیم میں کھیلے جانے والے فائنل میں کا مقابلہ جرمنی سے ہوگا جس نے منگل کو میزبان برازیل کو چھ گول سے ہرایا تھا۔ورلڈ کپ کے پہلے سیمی فائنل میں ہونے والی گولوں کی بارش کے برعکس بدھ کی شام ساؤ پاؤلو میں ارجنٹینا اور ہالینڈ کا مقابلہ مقرر
ہ وقت میں بغیر کسی گول کے برابر رہا۔اس میچ کے آغاز میں دونوں ٹیموں نے محتاط کھیل کا مظاہرہ کیا اور پہلے ہاف کے کھیل میں دونوں جانب سے گول کرنے کی کوئی قابلِ ذکر کوشش دکھائی نہیں دی۔ہالینڈ کے دفاعی کھلاڑیوں نے جہاں ارجنٹینا کے لیونیل میسی کو گھیرے رکھا اور انھیں کھل کر کھیلنے نہیں دیا وہیں ارجنٹینا کے دفاعی کھلاڑی میشارانو آئن روبن پر توجہ مرکوز کیے دکھائی دیے۔پہلے ہاف میں فریقین کے دفاعی انداز کی وجہ سے کھیل کی رفتار بھی سست رہی جس پر کھلاڑیوں کو تماشائیوں کی ہوٹنگ کا سامنا بھی کرنا پڑا۔ اس ہاف کے اختتام پر میچ بغیر کسی گول کے برابر رہا اور دوسرے ہاف میں بھی صورتحال میں کوئی تبدیلی نہ آئی۔مقررہ وقت کے دوسرے ہاف کے دوران ارجنٹینا کو گول کرنے کا پہلا واضح موقع 74ویں منٹ میں ملا تاہم ہیگوائن نہ صرف آف سائیڈ تھے بلکہ ان کا نشانہ بھی چوک گیا۔ہیگوائن کی کوشش کے کچھ ہی دیر بعد ارجنٹینا کے کوچ نے انھیں باہر بلا کر کوارٹر فائنل میچ میں زخمی ہونے کی وجہ سے نہ کھیلنے والے سرجیو اگویئروکو میدان میں اتارا لیکن وہ بھی مقررہ وقت کے اختتام تک اپنی ٹیم کو برتری دلوانے میں ناکام رہے۔مقررہ وقت کے آخری لمحات میں ارجنٹینا کے دفاعی کھلاڑی میشارانو کے آئن رابن کے یقینی گول کو روک کر ہالینڈ کی امیدوں پر پانی پھیر دیا۔اضافی وقت میں بھی دونوں ٹیمیں گول کرنے میں ناکام رہیں اور اس دوران ارجنٹینا کو ہی دو بار گول کرنے کے مواقع ملا لیکن پہلے رودریگز پلاسیو کا کمزور ہیڈر کیپر نے باآسانی روک لیا اور پھر میکسی رودریگز کی کمزور کک بھی انھیں چکمہ دینے میں ناکام رہی۔ ارجنٹینا کے سرجیو رمیرو نے ہالینڈ کے ولار کی پہلی پنالٹی روکی جبکہ ارجنٹینا کی جانب سے میسی نے گول کر کے اپنی ٹیم کو برتری دلوائی جسے اگلی پنالٹی پر رابن نے گول کر کے ختم کر دیا۔گیرائے نے ارجنٹینا کی جانب سے دوسری پنالٹی پر گول کیا اور ایک بار پھر ارجنٹینا کو آگے کر دیا۔ ہالینڈ کے شنائیڈر بھی گول نہ کر سکے اور یوں ارجنٹینا کی برتری دو گول ہوگئی۔اگوایرو نے ارجنٹینا اور کاؤت نے ہالینڈ کے لیے پنالٹی پر گول کیا اور پھر ارجنٹینا کی چوتھی پنالٹی  پر جب میکسی رادریگز کی شاٹ گول میں گئی تو ارجنٹینا تقریباً ڈھائی دہائی بعد ورلڈ کپ کے سیمی فائنل میں پہنچ گیا۔سیمی فائنل میں ہارنے کے بعد ہالینڈ کی ٹیم سنیچر کو تیسری اور چوتھی پوزیشن کے میچ میں برازیل کے مقابل ہو گی۔