مریخ سے متعلق تحقیق میں سائنسدانوں نے نیا راز دریافت کرلیا

مریخ کو آج زندگی کے لیے انتہائی ناموزوں سیارہ سمجھا جاتا ہے، تاہم سائنس دانوں کے لیے اس پر موجود برف اب بھی ماضی کے کئی اہم راز اپنے اندر محفوظ کیے ہوئے ہے۔ ایک نئی تحقیق میں مریخ کے شمالی قطب پر موجود برف کے حوالے سے اہم انکشاف سامنے آیا ہے، جس کے مطابق وہاں سائنس دانوں کے اندازے کے مقابلے میں گرد و غبار کی مقدار کم ہے۔

سائنس سے متعلق معلومات فراہم کرنے والے ادارے کی ایک حالیہ رپورٹ کے مطابق محققین کا کہنا ہے کہ مریخ کی برف میں اس سیارے کے قدیم موسم اور آب و ہوا سے متعلق اہم معلومات محفوظ ہوسکتی ہیں۔ ان معلومات کا جائزہ لے کر یہ سمجھنے میں مدد مل سکتی ہے کہ ماضی میں مریخ کا ماحول کیسا تھا اور کیا کبھی وہاں زندگی کے لیے سازگار حالات موجود تھے۔

ویب سائٹ کی رپورٹ کے مطابق مریخ کے قطبی علاقوں کے علاوہ سیارے کے بیشتر حصے میں موجود برف گرد و غبار کی تہوں کے نیچے دبی ہوئی ہے۔ سائنس دانوں کے مطابق یہ گرد و غبار محض برف کو ڈھانپنے تک محدود نہیں بلکہ مریخ کے موسمیاتی نظام پر بھی اثر انداز ہوتی ہے۔

گرد و غبار برف کی سطح کو زیادہ سیاہ کردیتی ہے، جس کے باعث سورج سے آنے والی روشنی کو خلا میں واپس منعکس کرنے کی صلاحیت متاثر ہوتی ہے۔ نتیجتاً برف زیادہ حرارت جذب کرسکتی ہے اور اس کے پگھلنے یا بخارات میں تبدیل ہونے کے عمل پر بھی اثر پڑتا ہے، واشنگٹن یونیورسٹی کی ایک نئی تحقیق میں شمالی قطب کی برف میں موجود گرد و غبار کی مقدار کا جائزہ لیا گیا۔ یہ تحقیق طبی جریدے این پی جے اسپیس ایکسپلوریشن میں شائع ہوئی ہے۔

تحقیق کے نتائج کے مطابق مریخ کے شمالی قطب کے گرد موجود برف میں توقع سے کم گرد و غبار پائی گئی ہے۔ محققین کے مطابق یہ دریافت مریخ کی برف کی ساخت، اس کے ماضی کے موسم اور سیارے کے طویل مدتی موسمیاتی حالات کو سمجھنے کے لیے اہم ثابت ہوسکتی ہے۔

واشنگٹن یونیورسٹی کی اپلائیڈ فزکس لیبارٹری سے وابستہ سینئر تحقیقی سائنس دان آدتیہ کُھلر نے بتایا کہ سائنس دان اس بات سے آگاہ ہیں کہ مریخ کے شمالی قطب کے گرد و نواح میں پانی برف کی شکل میں موجود ہے، تاہم طویل عرصے سے اس بات پر اختلاف رہا ہے کہ اس برف میں گرد و غبار کی اصل مقدار کتنی ہے۔

ان کے مطابق برف میں گرد و غبار کی مقدار بڑھنے سے اس کا رنگ زیادہ گہرا ہوجاتا ہے۔ گہرے رنگ کی سطح سورج کی زیادہ حرارت جذب کرتی ہے، جس سے اس کا درجہ حرارت بڑھ سکتا ہے اور برف کے بخارات میں تبدیل ہونے کا عمل تیز ہوسکتا ہے۔

محققین کے مطابق مریخ کی برف کا تفصیلی مطالعہ اس سیارے کی ماضی کی آب و ہوا کو سمجھنے میں اہم کردار ادا کرسکتا ہے۔ برف میں محفوظ یہ موسمیاتی ریکارڈ مستقبل میں اس بنیادی سوال کا جواب تلاش کرنے میں بھی مدد دے سکتے ہیں کہ کیا مریخ کبھی زندگی کے لیے موزوں ماحول رکھتا تھا۔