ایران کیخلاف ایک اور جنگ شروع کی گئی تو خطے میں امریکی فوجیوں کی ہلاکتوں کی تعداد دس گنا زیادہ ہوگی: محسن رضائی

ایرانی سپریم نیشنل سکیورٹی کونسل کےسیکرٹری محسن رضائی نے خبردار کیا ہے کہ ایران سفارت کاری کو ترجیح دیتا ہے لیکن اگر جنگ چھڑتی ہے تو جوابی حملے جاری رکھنے کے لیے ضروری وسائل موجود ہیں جبکہ انٹرنیٹ کیبلز، ڈیٹا سینٹرز اور مصنوعی ذہانت کی تنصیبات بھی نشانے پر آسکتی ہیں۔

ایرانی میڈیا کو انٹرویو میں بریگیڈیر جنرل محسن رضائی نے کہا کہ ٹرمپ نے جنگ ختم کرنے کی ایران کی تجویز کو التوا میں ڈال دیا ہے اور مذاکرات رک گئے ہیں۔

انہوں نے کہا کہ ٹرمپ کے پاس ایران کے ساتھ جنگ ختم کرنے کا کوئی واضح اور عملی منصوبہ نہیں اور اسی مسئلے نے سفارتی تعطل پیدا کردیا ہے۔

محسن رضائی نے کہا کہ ہم نے ابھی اپنی تمام صلاحیتیں استعمال نہیں کیں، اگلے مرحلے کے لیے بھی تیار ہیں۔ ان کا کہنا تھا کہ خطے میں امریکا کے قیمتی اثاثے موجود ہیں، اگر ایران کے خلاف ایک اور جنگ شروع کی گئی تو خطے کے ممالک میں امریکی فوجیوں کی تعیناتی کے طریقوں کے بارے میں ہماری معلومات کے پیش نظر ان کی ہلاکتوں کی تعداد دس گنا زیادہ ہوگی۔

انہوں نے کہا کہ اس جنگ کے جاری رہنے سے تعلقات کی صورتحال ایران کے حق میں بدل گئی ہےخلیجی ممالک ایران کےساتھ تعلقات پر نظرثانی کررہےہیں انہیں یقین ہوگیا ہے کہ امریکی فوج اپنے اڈوں کا دفاع کرنے کے بھی قابل نہیں۔