کینیڈا میں ڈائنوسار کے لباس میں 682 افراد اکٹھے، گینیز ورلڈ ریکارڈ قائم

اوٹاوا: کینیڈا میں ایک منفرد اور دلچسپ تقریب کے دوران سینکڑوں افراد نے ڈائنوسار کے لباس پہن کر نہ صرف اپنی یونیورسٹی کی 60 ویں سالگرہ منائی بلکہ ایک نیا عالمی ریکارڈ بھی قائم کر دیا۔ یہ رنگا رنگ تقریب یونیورسٹی آف کیلگری میں منعقد ہوئی جہاں طلبہ، اساتذہ اور شہریوں نے بھرپور شرکت کی۔

تفصیلات کے مطابق یونیورسٹی کی اسپورٹس ٹیمیں ڈائنوز کے نام سے مشہور ہیں، اسی مناسبت سے انتظامیہ نے ایک انوکھا آئیڈیا پیش کیا کہ سالگرہ کو منفرد انداز میں منایا جائے۔ اس مقصد کیلئے ٹیلر فیملی ڈیجیٹل لائبریری کے باہر لوگوں کو ڈائنوسار کے لباس میں جمع کیا گیا، جہاں دیکھتے ہی دیکھتے ایک بڑا مجمع اکٹھا ہو گیا۔

تقریب میں مجموعی طور پر 682 افراد نے ڈائنوسار کے ملبوسات پہن کر شرکت کی، جس کے بعد ڈائنوسار کے لباس میں سب سے بڑے مجمعے کا نیا گینیز ورلڈ ریکارڈ قائم ہو گیا۔ اس موقع پر گینیز ورلڈ ریکارڈز کے نمائندے بھی موجود تھے، جنہوں نے ریکارڈ کی باضابطہ تصدیق کی۔

اس سے قبل یہ ریکارڈ امریکا کے کوکس سائنس سینٹر اینڈ ایکویریم کے پاس تھا، جہاں 468 افراد نے ڈائنوسار کے لباس میں جمع ہو کر یہ اعزاز حاصل کیا تھا، اب کینیڈا کی اس یونیورسٹی نے اس ریکارڈ کو نمایاں فرق سے توڑ دیا ہے۔

منتظمین کا کہنا ہے کہ اس تقریب کا مقصد نہ صرف تفریح فراہم کرنا تھا بلکہ طلبہ اور کمیونٹی کے درمیان یکجہتی کو فروغ دینا بھی تھا۔ شرکاء نے اس منفرد تجربے کو خوب سراہا اور اسے یادگار لمحہ قرار دیا، جبکہ سوشل میڈیا پر بھی اس ایونٹ کی ویڈیوز اور تصاویر تیزی سے وائرل ہو رہی ہیں۔