پرالی کے دھوئیں سے پنجاب کی ہوا میں گھل گیا ’بلیک کاربن‘، دہلی اور یوپی بھی متاثر!

پنجاب میں پرالی جلانے سے ہوا میں مضر ’بلیک کاربن‘ کی مقدار بڑھ رہی ہے۔ اس کے صحت پر منفی اثرات مرتب ہو رہے ہیں۔ پنجاب یونیورسٹی، پی جی آئی اور آئی آئی ٹی دہلی کی ایک تحقیق میں یہ بات سامنے آئی ہے کہ دیہی علاقوں کی ہوا میں موجود بلیک کاربن کا 48 فیصد حصہ فصلوں کی باقیات جلانے سے پیدا ہوتا ہے۔

خریف کے موسم میں کھیتوں کے آس پاس ہوا کے نمونوں کی جانچ کی گئی۔ اس میں پایا گیا کہ مجموعی بلیک کاربن میں تقریباً نصف حصہ پرالی کے دھوئیں کا ہے۔ تحقیق سے معلوم ہوا کہ پنجاب میں پرالی جلانے سے ہونے والی آلودگی نہ صرف دہلی-این سی آر بلکہ ہریانہ، اتر پردیش اور آس پاس کی ریاستوں کو بھی متاثر کر رہی ہے۔

رپورٹ میں سفارش کی گئی ہے کہ کسانوں کو پرالی کے انتظام کے لیے مشینیں بروقت اور کم خرچ پر دستیاب کرائی جائیں۔ اس کے علاوہ پرالی سے بجلی، بایو فیول اور بایو ماس پیلیٹ جیسی مصنوعات تیار کرنے کی حوصلہ افزائی کرنے کی بات کہی گئی ہے۔

ساتھ ہی گاڑیوں، بجلی گھروں اور صنعتوں سے بلیک کاربن کے اخراج میں کمی لانے کی بھی سفارش کی گئی ہے۔ اس تحقیق میں پی جی آئی-پی یو کی ٹیم کے ساتھ ڈاکٹر مینک کمار اور آئی آئی ٹی دہلی کے وکاس گویل اور اجیت کمار بھی شامل تھے۔

بہرحال، پی جی آئی کے پروفیسر رویندر کھیوال کا کہنا ہے کہ فصلوں کی باقیات جلانے سے پنجاب کے دیہی علاقوں میں بلیک کاربن کی مقدار بڑھ رہی ہے۔ اس کے اثرات صرف پنجاب تک محدود نہیں ہیں بلکہ شمالی ہندوستان کے میدانی علاقوں کی ہوا بھی اس سے متاثر ہو رہی ہے۔

اس سے دمہ، دل کا دورہ اور فالج کا خطرہ بڑھ سکتا ہے۔ ان کا کہنا ہے کہ پرالی جلانے پر پابندی کے ساتھ گاڑیوں اور کارخانوں سے ہونے والی آلودگی کو بھی کم کرنا ہوگا۔

بلیک کاربن کیا ہے اور یہ کتنا خطرناک ہے؟
زرعی باقیات جلانے سے خارج ہونے والے باریک سیاہ ذرات کو ’بلیک کاربن‘ کہا جاتا ہے۔ یہ پی ایم 2.5 کا ایک اہم حصہ ہے اور ہوا میں تیرتا رہتا ہے۔ اس کی عمر 4 سے 7 دن ہوتی ہے۔ اس لیے اس کے اخراج میں کمی لا کر ہوا کے معیار کو بہتر بنایا جا سکتا ہے۔