قرآن پاک نذرِ آتش کرنے کی کوشش کرنے والے شخص پر اسپائیڈر مین کا حملہ

منیاپولس میں دائیں بازو کے رہنما کی اسلام مخالف ریلی کی کوشش ناکام: پولیس اور مظاہرین کے درمیان شدید جھڑپیں

امریکی ریاست مینیسوٹا کے شہر منیاپولس میں کیپیٹل ہل پر حملے کے متنازع کردار اور قرآن پاک نذرِ آتش کرنے کی کوشش کرنے والے شخص جیک لینگ کی جانب سے منعقدہ اسلام مخالف ریلی کے موقع پر شدید ہنگامہ آرائی دیکھنے میں آئی۔ سٹی ہال کے باہر سیکڑوں کی تعداد میں مخالف مظاہرین نے جمع ہو کر اس ریلی کا گھیراؤ کیا، جس کے بعد پولیس اور مظاہرین کے درمیان جھڑپیں ہوئیں اور بالآخر جیک لینگ کو حراست میں لے لیا گیا۔

جیک لینگ اور ان کے کچھ ساتھیوں نے فٹ پاتھ پر گاڑیاں چلاتے ہوئے سٹی ہال میں داخل ہونے کی کوشش کی، جس پر وہاں موجود مخالف مظاہرین نے شدید ردِعمل ظاہر کیا۔

مظاہرین کی جانب سے گاڑیوں پر پانی کے غبارے، بوتلیں اور دیگر اشیاء پھینکی گئیں، جبکہ اس دوران اسپائیڈر مین کا لباس پہنے ہوئے ایک شہری نے بھی گاڑی کے پچھلے حصے پر چڑھ کر حملہ کرنے کی کوشش کی۔ ہنگامے کے دوران دونوں جانب سے مرچوں کے اسپرے کا استعمال کیا گیا، جس سے صورتحال مزید کشیدہ ہو گئی۔

شہر کے عارضی پولیس چیف بل پیٹرسن نے ایک پریس کانفرنس کے دوران واقعے کی وضاحت کرتے ہوئے بتایا کہ دونوں گاڑیاں اچانک اور تیزی سے سٹی ہال کے پاس فٹ پاتھ پر آئیں جس سے ہجوم اور گاڑیوں میں سوار افراد کے درمیان فوری تصادم شروع ہو گیا۔

انہوں نے مزید کہا کہ اس وقت ہجوم کے درمیان کسی کو گرفتار کرنا محفوظ نہیں تھا، اس لیے انہوں نے گاڑیوں کو وہاں سے نکالنے کو ترجیح دی تاکہ صورتحال کو پرامن بنایا جا سکے، اور بعد میں ریاستی پولیس کی مدد سے دونوں گاڑیوں کو روک کر ذمہ داروں کو حراست میں لیا گیا۔

منیاپولس کے میئر جیکب فرے نے بتایا کہ اگر کوئی بھی شہری سٹ پاتھ پر گاڑیاں چلائے گا اور عوامی تحفظ کے لیے خطرہ بنے گا تو اس کے خلاف قانون کے مطابق سخت کارروائی کی جائے گی۔

اس موقع پر فریڈم روڈ سوشلسٹ آرگنائزیشن کے ایک منتظم جے یٹس نے پولیس کے رویے پر تنقید کرتے ہوئے کہا کہ وہ اس قسم کی نسل پرستانہ سرگرمیوں سے خوفزدہ نہیں ہیں اور جب عوام باہر نکل کر ان کا مقابلہ کرتے ہیں تو یہ بات ثابت ہو جاتی ہے کہ ہم مل کر ان کے عزائم کو ناکام بنا سکتے ہیں۔

فی الوقت جیک لینگ کو ضامن کے بغیر ہینپین کاؤنٹی جیل میں منتقل کر دیا گیا ہے۔