گریم سمتھ ہندوستان کے خلاف ابتدائی ون ڈے میں کیریئر کے 7 ہزار رنز مکمل کرنے کے لیے پرامید،11 رنز درکار

جوہانسبرگ۔ 3 دسمبر :جنوبی افریقہ کرکٹ ٹیم کے مایہ ناز اوپننگ بلے باز گریم سمتھ نے کہا ہے کہ وہ پر امید ہیں کہ ہندوستان کے خلاف ابتدائی ون ڈے میں اپنے ون ڈے کرکٹ کیریئر کے 7 ہزار رنز مکمل کر لیں گے۔ گریم سمتھ کو ون ڈے کرکٹ کیریئر کے 7 ہزار رنز مکمل کرنے کیلے مزید 11 رنز درکار ہیں۔ وہ یہ اعزاز حاصل کرنے والے تیسرے جنوبی افریقن بلے باز بن جائیں گے۔ پروٹیز کی جانب سے ون ڈے کرکٹ میں زیادہ رنز بنانے کا عالمی اعزاز جیک کیلس کو حاصل ہے۔ انہوں نے 11525 رنز بنا رکھے ہیں۔ گریم سمتھ پاکستان کے خلاف تیسرے اور آخری ون ڈے کرکٹ میچ میں یہ کارنامہ سرانجام دینے کے لیے پر امید
تھے تاہم انکی دادی کی وفات کے باعث وہ یہ کارنامہ سرانجام نہ دے سکے اور اب اس بات کا قومی امکان ہے کہ گریم سمتھ ہندوستان کے خلاف ہونے والے سیریز میں اس سنگ میل کو عبور کر لیں گے۔ گریم سمتھ نے 2002ء میں ون ڈے کیریئر کا آغاز کیا اور اب تک 196 ایک روزہ بین الاقوامی میچ کھیل چکے ہیں، انہوں نے 6989 رنز بنا رکھے ہیں جس میں 10 شاندار سنچریاں اور 47 نصف سنچریاں شامل ہیں۔