امریکا اور ایران کے درمیان حالیہ مذاکرات میں کوئی خاص پیش رفت نہ ہوسکی، امریکی نیوز ویب سائٹ

امریکی نیوز ویب سائٹ ایگزیوس نے دعویٰ کیا ہے کہ امریکا اور ایران کے درمیان حالیہ مذاکرات میں کوئی خاص پیش رفت نہ ہوسکی اور مذاکرات سے واقف 3 ذرائع نے بتایا کہ سفارتی پیش رفت کے لیے قطر کی ثالثی میں ہونے والی کوششیں تعطل کا شکار ہیں جبکہ دونوں فریق اپنے مؤقف سے پیچھے ہٹنے کو تیار نہیں۔

ایگزیوس کے مطابق قطری حکام مذاکرات میں پیش رفت کے لیے کوششیں جاری رکھیں گے تاہم امریکا اور ایران دونوں کے رویے سے ان کی مایوسی بڑھتی جارہی ہے۔

رپورٹ کے مطابق دو روز قبل قطری ثالث علی الثوادی نے نیویارک میں ایرانی وزیر خارجہ عباس عراقچی اور ان کی ٹیم سے ملاقات کی، جس میں قطر کی جانب سے پیش کردہ دو صفحات پر مشتمل سمجھوتے کی تجویز پر بات ہوئی، تجویز میں ایران کی امریکی بحری ناکہ بندی ختم کرنے کی درخواست اور امریکا کی جانب سے ایران سے جوہری معاملات پر رعایت کا مطالبہ شامل تھا۔

ایگزیوس کے مطابق عباس عراقچی سے ملاقات کے بعد قطری ثالث نے واشنگٹن میں جیرڈ کشنر اور دیگر امریکی حکام سے بھی ملاقات کی، جس کے ایک حصے میں نائب صدر جے ڈی وینس بھی شریک ہوئے۔

ذرائع کے مطابق پاکستان اور مصر سمیت دیگر علاقائی ثالثوں نے بھی ایران پر جوہری معاملات میں رعایت دینے پر زور دیا، تاہم ایران کا مؤقف ہے کہ وہ اس معاملے پر تب ہی غور کرے گا جب امریکا جون کے مفاہمتی سمجھوتے پر واپس آئے گا۔