یو پی میں بڑا سانحہ: فتح پور میں گیس سلنڈر دھماکے سے مکان منہدم؛ چار افراد ہلاک، سات کو ملبے سے نکالا گیا

فتح پور میں گیس سلنڈر کے زوردار دھماکے سے علاقے میں افراتفری پھیل گئی۔ دھماکے کے بعد کئی افراد ملبے تلے دب گئے اور متعدد زخمی ہوئے۔ پولیس اور امدادی ٹیموں نے موقع پر پہنچ کر ریسکیو آپریشن کیا اور سات افراد کو باہر نکالا۔ ان میں سے چار کی موت کی تصدیق ہو چکی ہے، جبکہ ایک شخص جسم کا 90 فیصد سے زائد حصہ جھلس جانے کے باعث تشویشناک حالت میں وینٹی لیٹر پر ہے۔

مکان کے مالک سریش گپتا (عرف دھنّر) سبزی اور پھل فروخت کرنے کا کام کرتے ہیں۔ پیر کی شام جب اہل خانہ رات کا کھانا پکا رہے تھے تو اچانک گیس سلنڈر پھٹ گیا۔ دھماکے کے نتیجے میں دو منزلہ مکان منہدم ہو گیا اور خاندان کے آٹھ افراد ملبے تلے دب گئے۔ آس پاس کے کئی مکانات بھی متاثر ہوئے۔ پولیس اور مقامی باشندوں نے فوری طور پر خاندان کو بچانے کا کام شروع کیا۔

ایس پی ابھیمنیو منگلک نے بتایا، “ہمیں اطلاع ملی کہ ایک سلنڈر پھٹ گیا ہے۔ مقامی لوگوں نے بتایا کہ دھماکے کے بعد لوگ ملبے تلے دب گئے اور زخمی ہوئے، اور انہیں مدد کی ضرورت ہے۔ اب تک کل سات افراد کو بحفاظت نکال لیا گیا ہے۔ ان میں سے چار کی موت کی تصدیق ہو چکی ہے۔ پانچواں شخص جسم کا 90 فیصد سے زائد حصہ جھلس جانے کی وجہ سے تشویشناک حالت میں ہے اور وینٹی لیٹر پر ہے۔ انہیں بچانے کی ہر ممکن کوشش کی جا رہی ہے۔”