برازیل میں 150 سال پرانے گھر کے فرش تلے ہزاروں غلاموں کی باقیات دریافت

ریو ڈی جنیرو: برازیل کے تاریخی شہر میں ڈیڑھ سو سال پرانے ایک مکان کی تزئین و آرائش کے دوران انسانی باقیات کا ملنا ایک ایسا انکشاف ہے جس نے انسانی حقوق کی تاریخ کے تاریک اور تکلیف دہ دور کی یادیں تازہ کر دی ہیں۔

خبر رساں اداروں کے مطابق گھر کی مالکہ مرسڈیز بپٹسٹا گومز پریرا نے جب اپنے رہائشی مکان کی مرمت کا فیصلہ کیا تو انہیں ہرگز اندازہ نہیں تھا کہ معمولی تعمیراتی کام کے دوران وہ ایک ایسے دردناک راز سے پردہ اٹھا دیں گی جو دہائیوں تک فرش کی اینٹوں تلے دبا رہا۔

مزدوروں نے جب گھر کا فرش توڑا تو وہاں انسانی ہڈیاں، دانت اور دیگر باقیات کا ڈھیر برآمد ہوا جس کے بعد ماہرین آثارِ قدیمہ نے اس مقام کی جانچ پڑتال شروع کی۔ تحقیقات سے ثابت ہوا کہ یہ مکان دراصل ایک قدیم اجتماعی قبر کے اوپر تعمیر کیا گیا تھا۔

تاریخی ریکارڈ کے مطابق یہ اجتماعی قبر اٹھارویں اور انیسویں صدی کے دوران افریقی نژاد غلاموں کی آخری آرام گاہ تھی۔ مورخین نے تصدیق کی کہ سن 1769 سے 1830 کے درمیان یہاں تقریباً 20 سے 40 ہزار افراد کو دفن کیا گیا تھا۔ یہ وہ بدقسمت افریقی تھے جو غلامی کی زنجیروں میں جکڑے گئے تھے۔

یہ لوگ بحرِ اوقیانوس کا سفر طے کرنے کے دوران یا برازیل پہنچتے ہی بھوک، بیماری اور انسانیت سوز حالات کے باعث موت کے منہ میں چلے گئے۔ ان بے نام و نشان افراد کو ان کے آقا اکثر اجتماعی قبروں میں پھینک دیتے تھے یا پھر ان کی لاشوں کو جلا دیا جاتا تھا۔

گھر کی مالکہ نے بتایا کہ عمارت کے جس بھی حصے کی کھدائی کی جاتی ہے وہاں سے انسانی باقیات ملنا معمول بن چکا ہے۔ انہیں شروع میں بالکل علم نہیں تھا کہ ان کا گھر ایک ایسی جگہ پر تعمیر ہوا ہے جہاں ہزاروں افراد کو بے بسی کی حالت میں سپردِ خاک کیا گیا تھا۔

اس تاریخی مقام کی اہمیت اور تلخ حقیقت کو مدنظر رکھتے ہوئے اب وہاں پروتوس نووس انسٹی ٹیوٹ کے نام سے ایک میوزیم قائم کیا گیا ہے۔ اس میوزیم میں ان باقیات کو محفوظ کر لیا گیا ہے تاکہ آنے والی نسلیں غلامی کے اس سیاہ دور کی ہولناکیوں اور مظلوموں کی کہانی سے آگاہ رہ سکیں۔