پچاس لاکھ ڈالر سے زائد مالیت رکھنے والا دنیا کا نایاب خط توجہ کا مرکز

دنیا بھر میں نایاب نوادرات اور تاریخی دستاویزات کی اپنی الگ اہمیت ہے، تاہم ایک ایسا خط بھی موجود ہے جسے دنیا کا مہنگا ترین خط قرار دیا جاتا ہے۔ “بورڈو لیٹر” کے نام سے معروف یہ تاریخی خط اس وقت ایک گمنام سنگاپوری کلیکٹر کی ملکیت میں ہے، جبکہ ماہرین اس کی متوقع مالیت 50 لاکھ ڈالر سے بھی زیادہ قرار دیتے ہیں۔

دلچسپ بات یہ ہے کہ اس خط کی غیرمعمولی قدر اس میں درج تحریر کی وجہ سے نہیں بلکہ اس پر چسپاں کیے گئے نایاب ڈاک ٹکٹوں کے باعث ہے، جو دنیا کے انتہائی قیمتی اور نادر ڈاک ٹکٹوں میں شمار کیے جاتے ہیں۔

تاریخی ریکارڈ کے مطابق یہ خط 4 اکتوبر 1847 کو برطانوی نوآبادی ماریشس کے دارالحکومت پورٹ لوئس میں مقیم شراب کے تاجر ایڈورڈ فرانسس نے فرانس کے شہر بورڈو میں اپنے تجارتی شراکت داروں کے نام روانہ کیا تھا۔ خط میں انہوں نے 48 بیرل شراب کی وصولی اور ان میں سے تقریباً ایک تہائی فروخت کیے جانے کی اطلاع دی تھی، جو بظاہر ایک معمول کی کاروباری مراسلت تھی۔

اس خط پر دو مختلف نایاب ڈاک ٹکٹ استعمال کیے گئے تھے، جنہیں “ماریشس بلیو” اور “ماریشس پنک” کے نام سے جانا جاتا ہے۔ یہی منفرد امتزاج “بورڈو لیٹر” کو دنیا کے قیمتی ترین خطوط میں شامل کرتا ہے اور اسے ڈاک ٹکٹوں کی تاریخ کا ایک غیرمعمولی شاہکار بنا دیتا ہے۔

تاریخی دستاویزات کے مطابق 1847 میں ان ڈاک ٹکٹوں کی چھپائی کے دوران ایک کندہ کار سے ایک اہم غلطی سرزد ہو گئی۔ ملکہ وکٹوریہ کی تصویر کے ساتھ “پوسٹ پیڈ” کے بجائے “پوسٹ آفس” تحریر کر دیا گیا۔ اس خامی کے ساتھ صرف 500 ڈاک ٹکٹ شائع ہوئے، جنہیں فروخت کرنے کے بعد فوری طور پر ڈیزائن درست کر دیا گیا، جس کے باعث ابتدائی غلطی والے ٹکٹ انتہائی نایاب بن گئے۔

وقت گزرنے کے ساتھ ان میں سے صرف 27 اصل ڈاک ٹکٹ محفوظ رہ سکے، جن میں 12 نیلے اور 15 گلابی رنگ کے ہیں۔ ڈاک ٹکٹ جمع کرنے والے ماہرین کے نزدیک یہ دنیا کے نادر ترین اور قیمتی ترین نوادرات میں شمار ہوتے ہیں۔

ماہرین کا کہنا ہے کہ اگر “ماریشس بلیو” ڈاک ٹکٹ مکمل اصل حالت میں دستیاب ہو تو اس کی قیمت تقریباً 1 کروڑ 14 لاکھ سے 1 کروڑ 70 لاکھ ڈالر تک پہنچ سکتی ہے، تاہم ایسے نمونے شاذ و نادر ہی فروخت کے لیے سامنے آتے ہیں۔

رپورٹس کے مطابق “بورڈو لیٹر” کو آخری مرتبہ 1993 میں نیلامی کے لیے پیش کیا گیا تھا، جس کے بعد یہ ایک گمنام سنگاپوری کلیکٹر کے نجی ذخیرے کا حصہ بن گیا۔ اس کے بعد سے یہ تاریخی خط عوامی نمائش یا کسی نئی نیلامی میں پیش نہیں کیا گیا، جس کے باعث اس کی نایابی اور اہمیت مزید بڑھ گئی ہے۔