چین میں نیا رجحان، لوگ اپنا چہرہ لائسنس پر دے کر پیسے کمانے لگے

بیجنگ: چین میں مصنوعی ذہانت کی ترقی نے روزگار کے روایتی تصورات بدل دیے ہیں، اب عام لوگ اپنے چہرے یا ڈیجیٹل شناخت کو اے آئی منصوبوں کے لیے لائسنس پر دے کر رقم کما رہے ہیں۔ یہ منفرد کاروبار تیزی سے مقبولیت حاصل کر رہا ہے۔

مصنوعی ذہانت سے تیار کردہ ڈراموں، ویڈیو گیمز اور اشتہارات کے پروڈیوسرز اب حقیقی انسانوں کے چہروں کی تلاش میں رہتے ہیں۔ خواہش مند افراد مختلف پلیٹ فارمز پر اپنی پروفائل بناتے ہیں اور تصدیق کے بعد اپنے ڈیجیٹل حقوق کو محدود مدت کے لیے کرایے پر دیتے ہیں۔

اس رجحان کے پیچھے بڑی وجہ اے آئی سے تیار ہونے والی مختصر ڈراموں کی صنعت ہے۔ پروڈیوسرز کا کہنا ہے کہ اے آئی بے شمار چہرے تخلیق کر سکتی ہے مگر حقیقی انسانوں کے چہرے زیادہ پرکشش، منفرد اور حقیقت پسندانہ نظر آتے ہیں، جن کی مانگ کافی زیادہ ہے۔

آمدنی کا انحصار معاہدے کی شرائط اور پلیٹ فارم پر ہوتا ہے۔ ایک بینک ملازم نے 3 دن میں اپنے پورٹریٹ کے چند استعمال کے عوض تقریباً 373 امریکی ڈالر کمائے۔ کچھ کمپنیاں فی قسط 15 سے 74 ڈالر تک کی ادائیگی کر رہی ہیں جو ایک نئی آمدنی ہے۔

تاہم اس کام کے ساتھ سنگین خدشات بھی وابستہ ہیں۔ ماہرین خبردار کرتے ہیں کہ لائسنس پر دیے گئے چہروں کو اصل مقصد سے ہٹ کر دوبارہ استعمال کیا جا سکتا ہے۔ اس لیے معاہدوں میں واضح شرائط کا ہونا ضروری ہے تاکہ ڈیجیٹل شناخت کا غلط استعمال نہ ہو۔

اے آئی کی بدولت تفریحی صنعت میں پیداواری اخراجات میں 80 فیصد تک کمی آئی ہے اور کام کی رفتار بھی بڑھ گئی ہے۔ مستقبل میں اداکاری کے ساتھ آواز اور مکمل ڈیجیٹل شناخت کا لائسنس دینا ایک عام معاشی سرگرمی بن سکتی ہے، جس پر مزید بحث جاری ہے۔

بنیادی سوال اب بھی یہی ہے کہ لوگ اپنی ڈیجیٹل شناخت پر کتنا اختیار چھوڑنے کے لیے تیار ہیں۔ یہ نئی ڈیجیٹل معیشت جہاں مالی مواقع لائی ہے، وہیں اسے انسانی شناخت کے تحفظ اور ذاتی ڈیٹا کی رازداری کے حوالے سے چیلنجز کا سامنا بھی رہے گا۔