ٹرمپ ایران سے براہِ راست مذاکرات کے لیے تیار، ایندھن کی بڑھتی قیمتوں پر روس یوکرین جنگ کو ذمہ دار قرار دے دیا

واشنگٹن: امریکی صدر ڈونلڈ ٹرمپ نے کہا ہے کہ وہ ایران کے ساتھ براہِ راست مذاکرات کے لیے تیار ہیں، جبکہ انہوں نے ایندھن کی قیمتوں میں اضافے کی ذمہ داری روس یوکرین جنگ اور امریکا میں بعض ریفائنریوں کی بندش پر عائد کی ہے۔

وائٹ ہاؤس میں صحافیوں سے گفتگو کرتے ہوئے ڈونلڈ ٹرمپ نے کہا کہ وہ ایران کے ساتھ براہِ راست مذاکرات کے لیے ہمیشہ تیار ہیں۔ امریکی صدر نے یہ بھی کہا کہ ان کے خیال میں متحدہ عرب امارات کے طیارے سے پیش آنے والے واقعے کا ذمہ دار ایران ہے۔

ڈونلڈ ٹرمپ کا برطانیہ کے آر اے ایف فیئرفورڈ ایئربیس سے امریکی بمبار طیاروں کی واپسی کے معاملے پر بھی گفتگو کرتے ہوئےکہنا تھا کہ ایک مخصوص خطرے کے باعث امریکی بمبار طیاروں کو واپس بلانا پڑا۔

امریکی صدر نے سوشل میڈیا پلیٹ فارم ٹروتھ سوشل پر اپنی ایک پوسٹ میں کہا کہ ایندھن کی بڑھتی ہوئی قیمتوں کا تعلق اب ایران کے خلاف جنگ سے نہیں رہا۔

ٹرمپ نے ایندھن کی قیمتوں میں اضافے کی وجہ روس یوکرین جنگ اور امریکا میں ریفائنریوں سے متعلق مسائل کو قرار دیا۔ ان کے مطابق روسی ریفائنریوں کو یوکرین کی جانب سے نشانہ بنایا جا رہا ہے، جبکہ امریکا کی ریاست کیلیفورنیا سمیت بعض ڈیموکریٹک ریاستوں میں ریفائنریاں بند کی جا رہی ہیں۔

امریکی صدر نے مزید کہا کہ پیٹرول کی قیمتوں میں اضافے کی وجہ اب آبنائے ہرمز نہیں بلکہ ریفائنریوں سے متعلق مسائل ہیں۔