مصنوعی ذہانت کی سنگین غلطی، خاتون کو چھ ماہ جیل بھگتنا پڑی

امریکا میں جدید ٹیکنالوجی کے استعمال سے جڑے ایک حیران کن واقعے نے مصنوعی ذہانت کے نظام پر سنجیدہ سوالات کھڑے کر دیے، جہاں چہرہ شناخت کرنے والے ایک خودکار سافٹ ویئر کی غلطی کے باعث ایک بے گناہ خاتون کو تقریباً چھ ماہ قید میں گزارنا پڑ گئے۔

تفصیلات کے مطابق 50 سالہ اینجلا لِپس کو گزشتہ سال جولائی میں اس وقت گرفتار کیا گیا جب ریاست نارتھ ڈیکوٹا کی پولیس نے ایک بینک میں ہونے والے فراڈ کیس کی تفتیش کے دوران مصنوعی ذہانت پر مبنی شناختی نظام استعمال کیا۔ اس نظام نے بینک کی نگرانی کرنے والے کیمروں کی ویڈیو میں موجود ایک مشتبہ خاتون کو اینجلا لِپس قرار دے دیا، جس پر الزام تھا کہ اس نے جعلی فوجی شناختی کارڈ کے ذریعے ہزاروں ڈالر نکلوائے۔

تحقیقات کے دوران ایک تفتیشی افسر نے مصنوعی ذہانت سے حاصل ہونے والی تصویر کا موازنہ اینجلا لِپس کے سوشل میڈیا اکاؤنٹس اور ڈرائیونگ لائسنس کی تصویر سے کیا، تاہم عملی طور پر ان کی براہِ راست شناخت کی تصدیق نہیں کی جا سکی۔ اس کے باوجود انہیں حراست میں لے کر مقدمہ درج کر لیا گیا۔

مقامی ذرائع کے مطابق حکام نے اینجلا لِپس سے اس وقت باضابطہ طور پر رابطہ کیا جب وہ ریاست ٹینیسی کی ایک کاؤنٹی جیل میں پہلے ہی 108 دن گزار چکی تھیں۔ ان کی گرفتاری کے بعد ان پر نجی شناختی معلومات کے غیر مجاز استعمال اور چوری سے متعلق چار، چار الزامات عائد کیے گئے، جس سے ان کی مشکلات میں مزید اضافہ ہو گیا۔

تاہم بعد ازاں جب تفتیش کا دائرہ وسیع کیا گیا اور بینکاری ریکارڈ کی جانچ پڑتال کی گئی تو یہ اہم حقیقت سامنے آئی کہ مبینہ فراڈ کے وقت اینجلا لِپس وقوعہ کے مقام سے 1900 کلومیٹر سے زائد فاصلے پر موجود تھیں۔ اس ناقابل تردید ثبوت کے بعد ان کے خلاف مقدمہ کرسمس کے موقع پر ختم کر دیا گیا۔

یہ واقعہ نہ صرف ایک فرد کے ساتھ ہونے والی سنگین ناانصافی کو اجاگر کرتا ہے بلکہ مصنوعی ذہانت پر اندھا اعتماد کرنے کے خطرات کی بھی نشاندہی کرتا ہے، جس پر اب قانونی اور تکنیکی حلقوں میں بحث شدت اختیار کر گئی ہے۔