ایرانی حملوں سے ہونے والے نقصانات کے بعد امریکا کا فوجی اڈوں کی منتقلی پر غور

واشنگٹن / منامہ: امریکی اخبار وال اسٹریٹ جرنل کی ایک رپورٹ میں دعویٰ کیا گیا ہے کہ ایران کے جوابی حملوں کے نتیجے میں ہونے والے فوجی نقصانات کے بعد امریکا مشرقِ وسطیٰ میں اپنے بعض فوجی اڈوں اور تنصیبات کے مستقبل پر غور کر رہا ہے جبکہ کچھ فوجی اثاثے دیگر مقامات پر منتقل کرنے کی تجاویز بھی زیرِ بحث ہیں۔

رپورٹ کے مطابق ایران نے 28 فروری کو امریکا اور اسرائیل کی فضائی کارروائیوں کے جواب میں خلیجی خطے میں موجود امریکی فوجی تنصیبات کو نشانہ بنایا تھا، ان حملوں کے بعد امریکی دفاعی حکام نے خطے میں اپنی فوجی حکمتِ عملی اور تنصیبات کے تحفظ کے حوالے سے نئے اقدامات پر غور شروع کر دیا ہے۔

رپورٹ میں دعویٰ کیا گیا ہے کہ حملوں کے دوران متعدد امریکی تنصیبات کو نقصان پہنچا اور بعض مقامات پر فوجی ڈھانچے، گوداموں، مواصلاتی نظام اور دیگر سہولیات متاثر ہوئیں، نقصانات کا اندازہ سیٹلائٹ تصاویر، سرکاری تعمیراتی لاگت اور دیگر دستیاب معلومات کی بنیاد پر لگایا گیا ہے، تاہم اصل نقصان اس سے زیادہ بھی ہو سکتا ہے کیونکہ حساس فوجی آلات کی مالیت اس تخمینے میں مکمل طور پر شامل نہیں۔

وال اسٹریٹ جرنل کے مطابق بحرین میں قائم امریکی بحریہ کے اہم اڈے کو بھی نقصان پہنچا،امریکی حکام اس اڈے کی مکمل ازسرِنو تعمیر کے بجائے بعض کمانڈ سینٹرز کو زیرِ زمین منتقل کرنے اور کچھ عمارتوں کی تعمیرِ نو نہ کرنے جیسے آپشنز پر غور کر رہے ہیں۔

رپورٹ میں مزید کہا گیا ہے کہ امریکا کویت اور سعودی عرب میں اپنی فوجی موجودگی محدود کرنے کے امکانات کا بھی جائزہ لے رہا ہے۔ اس کے برعکس بعض فوجی اثاثوں اور تنصیبات کو اسرائیل منتقل کرنے کی تجویز بھی زیرِ غور بتائی گئی ہے تاکہ خطے میں امریکی موجودگی برقرار رکھی جا سکے۔

اخبار کے مطابق ایران کے ساتھ حالیہ کشیدگی نے امریکی دفاعی اخراجات میں بھی اضافہ کیا ہے،وزیرِ دفاع پیٹ ہیگستھ جنگ کے بعد دفاعی صلاحیتوں کی بحالی کے لیے اضافی فنڈز کے حصول کی کوشش کر رہے ہیں۔

واضح رہے کہ امریکی صدر ڈونلڈ ٹرمپ کو ایران کے ساتھ کشیدگی اور اس سے وابستہ اخراجات پر اندرونِ ملک سیاسی تنقید کا سامنا بھی بتایا جا رہا ہے،حال ہی میں امریکا اور ایران کے درمیان ایک مفاہمتی یادداشت طے پائی ہے، جس کے تحت کشیدگی میں کمی اور تنازعات کے حل کے لیے ساٹھ روزہ مذاکراتی عمل شروع کیا گیا ہے۔