بکریوں میں انسانوں سے متعلق حیران کن صلاحیت دریافت

زیورخ: بکریوں کو عموماً ایک عام اور کم فہم جانور تصور کیا جاتا ہے، تاہم سائنس دانوں کی تازہ تحقیق نے اس تاثر کو چیلنج کرتے ہوئے انکشاف کیا ہے کہ یہ جانور انسانی اشاروں اور آوازوں کو سمجھنے کی غیرمعمولی صلاحیت رکھتے ہیں۔

سوئٹزر لینڈ میں ہونے والی ایک سائنسی تحقیق کے مطابق بکریاں نہ صرف انسانوں کی آواز کو پہچان سکتی ہیں بلکہ اس کی سمت کا تعین کرکے مطلوبہ چیز تک بھی پہنچ جاتی ہیں۔ ماہرین کا کہنا ہے کہ یہ صلاحیت جانوروں کی ذہانت اور انسانوں کے ساتھ ان کی مطابقت کے بارے میں نئی معلومات فراہم کرتی ہے۔

زیورخ یونیورسٹی کے محققین نے اپنی تحقیق کے دوران دریافت کیا کہ بکریاں چھوٹے بچوں کی طرح آواز کے سراغ پر چلتے ہوئے پوشیدہ اشیا یا خوراک تک رسائی حاصل کر سکتی ہیں۔ تحقیق کے مطابق اگر کسی مقام پر خوراک موجود ہو اور اس کی جانب انسانی آواز رہنمائی فراہم کرے تو بکریاں اس اشارے سے فائدہ اٹھاتے ہوئے درست سمت کا انتخاب کر لیتی ہیں۔

اس صلاحیت کا جائزہ لینے کے لیے سائنس دانوں نے ایک دلچسپ تجربہ ترتیب دیا۔ مختلف مقامات پر 2 بالٹیاں رکھی گئیں جن میں سے ایک میں خوراک موجود تھی۔ محققین خود ایک پردے کے پیچھے موجود رہے اور بکریوں کو آواز دے کر متوجہ کرتے رہے، جبکہ خوراک والی بالٹی بکریوں کی نظروں سے اوجھل نہیں تھی۔

تحقیق کے دوران 29 بکریوں پر مجموعی طور پر 12 مرتبہ تجربات کیے گئے۔ نتائج سے معلوم ہوا کہ بکریاں تقریباً 60 فیصد مواقع پر انسانی آواز کا تعاقب کرتے ہوئے درست مقام پر پہنچ گئیں اور خوراک تلاش کرنے میں کامیاب رہیں۔ اس کے برعکس جب کوئی آواز استعمال نہیں کی گئی تو کامیابی کی شرح کم ہو کر 47 فیصد رہ گئی۔

محققین کے مطابق یہ فرق واضح طور پر ظاہر کرتا ہے کہ بکریاں انسانی آواز سے رہنمائی حاصل کرتی ہیں اور بغیر کسی باقاعدہ تربیت کے بھی ایسے شخص کی آواز پر ردعمل دیتی ہیں جو ان کی نظروں سے اوجھل ہو۔ ماہرین کا کہنا ہے کہ یہ رویہ انسانوں اور بکریوں کے درمیان وقت کے ساتھ پیدا ہونے والی ذہنی ہم آہنگی کی عکاسی کرتا ہے۔

تحقیق میں یہ بھی نشاندہی کی گئی کہ اس نوعیت کی صلاحیت بعض انتہائی ذہین جانداروں میں بھی واضح طور پر نہیں دیکھی گئی۔ مثال کے طور پر چمپینزیوں میں انسانی آواز کی سمت سے رہنمائی حاصل کرنے کا ایسا رجحان سامنے نہیں آیا، جبکہ کتوں میں یہ خصوصیت پہلے سے ریکارڈ کی جا چکی ہے۔

یہ پہلا موقع نہیں جب بکریوں کی ذہانت نے ماہرین کو حیران کیا ہو۔ اس سے قبل ہونے والی متعدد تحقیقات میں بھی یہ ثابت ہو چکا ہے کہ بکریاں انسانوں کے ہاتھ کے اشاروں کو سمجھنے، آوازوں میں موجود جذبات کو محسوس کرنے اور چہروں کے تاثرات میں مثبت رویوں کو ترجیح دینے کی صلاحیت رکھتی ہیں۔ تازہ تحقیق نے ایک بار پھر یہ ثابت کر دیا ہے کہ بکریاں بظاہر سادہ دکھائی دینے کے باوجود توقع سے کہیں زیادہ ذہین اور سمجھدار جانور ہیں۔