ایک سے زیادہ زبانیں سیکھنے سے دماغ دیر تک جوان رہتا ہے: تحقیق

اگر آپ بڑھتی عمر کے باوجود اپنے دماغ کو متحرک، چاق و چوبند اور نسبتاً جوان رکھنا چاہتے ہیں تو نئی زبان سیکھنے کی عادت اس مقصد میں اہم کردار ادا کر سکتی ہے۔ اسپین میں ہونے والی ایک نئی طبی تحقیق سے معلوم ہوا ہے کہ ایک سے زیادہ زبانوں پر عبور رکھنے والے افراد کے دماغ عمر بڑھنے کے باوجود نسبتاً زیادہ جوان رہتے ہیں اور ان میں دماغی بڑھاپے کی رفتار بھی سست پڑ سکتی ہے۔

تحقیق کے مطابق نئی زبان سیکھنا صرف گفتگو کا ذریعہ حاصل کرنے تک محدود نہیں رہتا بلکہ اس عمل کے دوران دماغ مسلسل نئی معلومات کو محفوظ کرتا، مختلف حصوں کے درمیان رابطے مضبوط بناتا اور ذہنی صلاحیتوں کو متحرک رکھتا ہے، جس کے نتیجے میں دماغی افعال پر مثبت اثرات مرتب ہوتے ہیں۔

اس تحقیق کو اسپین کے ادارے باسک سینٹر آن کاگنیشن، برین اینڈ لینگویج کے ماہرین نے انجام دیا، جس میں ابتدائی مرحلے پر 728 افراد کو شامل کیا گیا۔ محققین نے شرکاء کے دماغی اسکینز کا تفصیلی جائزہ لینے کے بعد ایک ایسا نظام تیار کیا جسے دماغی عمر جانچنے والی گھڑی قرار دیا گیا۔ اس طریقہ کار کے ذریعے دماغ کے مختلف حصوں کے باہمی تعلق اور سرگرمی کی بنیاد پر ہر فرد کی حقیقی دماغی عمر کا تخمینہ لگایا گیا۔

تحقیق کو مزید مستند بنانے کے لیے بعد ازاں 144 مزید افراد کو بھی اس میں شامل کیا گیا اور انہی اصولوں کے مطابق ان کے دماغی تجزیے کیے گئے۔ دونوں مراحل کے نتائج نے ایک ہی رجحان کی تصدیق کی کہ متعدد زبانیں جاننے والے افراد کا دماغ، صرف ایک زبان بولنے والوں کے مقابلے میں نمایاں طور پر کم عمر دکھائی دیتا ہے۔

محققین کے مطابق نتائج سے معلوم ہوا کہ ایک سے زیادہ زبانیں بولنے والے افراد کے دماغ اوسطاً 6 سے 13 سال تک زیادہ جوان نظر آتے ہیں۔ تحقیق میں یہ رجحان بھی سامنے آیا کہ زبانوں کی تعداد میں اضافے کے ساتھ دماغی عمر میں بھی مزید کمی دیکھی گئی۔

اعداد و شمار کے مطابق 2 زبانوں پر عبور رکھنے والے افراد کے دماغ تقریباً 6 سال کم عمر محسوس ہوئے، 3 زبانیں جاننے والوں میں یہ فرق تقریباً 7 سال تک پہنچ گیا جبکہ 4 زبانوں سے واقف افراد کے دماغی تجزیے میں عمر کا فرق 13 سال تک ریکارڈ کیا گیا۔

ماہرین کا کہنا ہے کہ اس تحقیق سے واضح ہوتا ہے کہ مختلف زبانیں سیکھنا اور استعمال کرنا دماغ کو مسلسل سرگرم رکھتا ہے، جس سے اس کی کارکردگی بہتر رہنے کے امکانات بڑھ جاتے ہیں۔ ان کے مطابق خاص طور پر نوجوانی میں نئی زبان سیکھنے کی عادت مستقبل میں دماغی بڑھاپے کی رفتار کو سست کرنے میں مددگار ثابت ہو سکتی ہے۔

محققین نے مزید بتایا کہ آئندہ مرحلے میں وہ اس پہلو کا بھی تفصیلی جائزہ لیں گے کہ متعدد زبانیں سیکھنے کا الزائمر اور دیگر دماغی تنزلی سے جڑے امراض کے خطرات یا ان کی رفتار پر کس حد تک مثبت اثر پڑتا ہے۔