کینیڈا نے ایران کے 10 افراد اور اداروں پر پابندیاں عائد کر دیں

کینیڈا کی وزیر خارجہ انیتا آنند نے کہا ہے کہ ایرانی حکومت کے ظالمانہ جبر میں کردار ادا کرنے پر ایران کے 10 افراد اور اداروں کے خلاف پابندیاں عائد کردی گئی ہیں۔

انیتا آنند نے ایک بیان میں کہا کہ کینیڈا ایرانی حکومت کے قابلِ مذمت اقدامات کے خلاف ردعمل دینے کے لیے اپنے اختیار میں موجود ہر ذریعہ استعمال کر رہا ہے۔

ان کا کہنا تھا کہ ان اقدامات میں عالمی امن و سلامتی کو خطرے میں ڈالنے سے لے کر بڑے پیمانے پر انسانی حقوق کی خلاف ورزیوں کا ارتکاب شامل ہے۔

بیان کے مطابق پابندیوں کا نشانہ ایران کے اعلیٰ سکیورٹی اور حکومتی عہدیداروں کے علاوہ ریاستی سرپرستی میں کام کرنے والے وہ ادارے بھی ہیں جو ’ڈیجیٹل جبر‘ میں ملوث ہیں۔ ان میں ایران کے وزیر داخلہ اسکندر مومنی بھی شامل ہیں۔