بالی وڈ اداکار مشتاق خان نے اپنی آخری گفتگو میں کیا کہا؟ بیٹے نے بتادیا

اداکار مشتاق خان مرحوم کے بیٹے محسن خان نے والد کے آخری دنوں کا حال بتادیا۔

بھارتی میڈیا کے مطابق مشتاق خان کینسر کے مرض میں مبتلا تھے اور کافی عرصے تک کینسر سے جنگ لڑتے ہوئے 75 سال کی عمر میں رواں ہفتے انتقال کرگئے۔

مشتاق خان کے بیٹے محسن خان نے اپنے والد کی زندگی کے آخری دنوں کو یاد کرتے ہوئے بتایا کہ ان کے والد بالکل بھی پریشان نہیں تھے اور ان کا دم ہنستے ہوئے نکلا ہے۔

بالی وڈ کے سینئر اداکار مشتاق خان انتقال کرگئے

محسن خان نے کہا کہ والد کو کینسر کی تشخیص ہوئی تھی، کینسر پہلی اسٹیج کا تھا اور علاج چل رہا تھا لیکن پھر کینسر تیزی سے پھیلنے لگا اور جب تک ہمیں اس بات کا علم ہوا تو ان کا انتقال ہوگیا۔

اداکار کے بیٹے نے بتایا کہ والد کے ساتھ میری آخری بات چیت کے دوران وہ بہت خوش تھے، وہ مسکرا رہے تھے اور انہوں نے کہا کہ میں اس دنیا میں آنے پر بہت خوش ہوں، میں نے جو بھی کام کیا، امید ہے کہ وہ لوگوں تک پہنچا ہوگا اور یقیناً وہ کام لوگوں تک پہنچا بھی۔

محسن خان نے انکشاف کیا کہ اداکار مشتاق خان کے کئی پروجیکٹس ریلیز کے لیے بھی تیار ہیں۔