برمودا سے بوسٹن جانے والی ایئر ایمبولینس سمندر میں گر کر تباہ، 6 افراد لاپتا

برمودا سے امریکی شہر بوسٹن جانے والی کینیڈا میں رجسٹرڈ ایئر ایمبولینس کے بحر اوقیانوس میں گرنے کی تصدیق ہوگئی ہے، امریکی کوسٹ گارڈ نے نانٹکٹ کے قریب سمندر میں طیارے کا ملبہ تلاش کرلیا، طیارے میں سوار 6 افراد تاحال لاپتا ہیں اور ان کی صورتحال کے بارے میں کوئی حتمی اطلاع سامنے نہیں آئی۔

امریکی کوسٹ گارڈ کے مطابق طبی امدادی پرواز کے طور پر استعمال ہونے والا گلف اسٹریم جی 100 طیارہ برمودا کے ایل ایف ویڈ بین الاقوامی ہوائی اڈے سے بوسٹن کے لیے روانہ ہوا تھا۔ طیارے میں 4 رکنی کینیڈین عملہ، ایک مریض اور اس کا ایک عزیز سوار تھا۔ طیارہ کینیڈا کی کمپنی لیٹی ٹیوڈ ایئر ایمبولینس کے زیر انتظام تھا۔

حکام کے مطابق طیارے نے برمودا سے رات گئے پرواز شروع کی اور امریکی ریاست میساچوسٹس کے ساحل کے قریب نانٹکٹ کے جنوب میں پہنچنے کے دوران فضائی ٹریفک کنٹرول سے رابطہ منقطع ہوگیا۔ پرواز کے آخری مرحلے میں طیارے کے پائلٹ نے بجلی سے متعلق خرابی کی اطلاع دی تھی، جس کے بعد طیارے کی پرواز میں اچانک غیر معمولی تبدیلی دیکھی گئی۔

پرواز سے متعلق دستیاب اعداد و شمار کے مطابق طیارہ تقریباً 24 ہزار فٹ کی بلندی پر پرواز کر رہا تھا، چند منٹ کے دوران اس کی بلندی میں ہزاروں فٹ کی تیزی سے کمی ہوئی اور وہ ریڈار سے غائب ہوگیا،طیارے کے رابطے سے محروم ہونے کے بعد فوری طور پر تلاش اور امدادی کارروائی شروع کردی گئی۔

فضائی ٹریفک کنٹرول اور پائلٹ کے درمیان آخری رابطے کے دوران صورتحال معمول کے مطابق نہیں تھی،کنٹرولر نے پائلٹ سے ہنگامی صورتحال کے اعلان کے بارے میں بھی دریافت کیا، رابطہ واضح نہ ہونے کے باعث پائلٹ کی جانب سے دیا گیا جواب مکمل طور پر سمجھا نہیں جاسکا۔ طیارے کے اچانک تیزی سے نیچے آنے اور اس کے بعد ریڈار سے غائب ہونے نے حادثے کی صورتحال کو مزید تشویشناک بنا دیا۔

طیارے کے لاپتا ہونے کے بعد امریکی کوسٹ گارڈ نے بڑے پیمانے پر تلاش کا آغاز کیا۔ کارروائی میں طیارے، ہیلی کاپٹر، بحری جہاز اور دیگر امدادی ذرائع استعمال کیے گئے۔ تلاش کے دوران نانٹکٹ کے قریب سمندر میں ایک ملبے کا میدان دریافت ہوا جس کی شناخت لاپتا ایئر ایمبولینس کے طور پر کی گئی۔

امریکی کوسٹ گارڈ کے مطابق ملبہ ملنے کے باوجود تلاش کا عمل ختم نہیں کیا گیا اور امدادی ٹیمیں طیارے میں سوار 6 افراد کی تلاش جاری رکھے ہوئے ہیں، طیارے میں سوار 4 افراد کینیڈین جبکہ 2 افراد برمودا کے شہری تھے۔ اہل خانہ کو صورتحال سے آگاہ رکھا جارہا ہے اور متعلقہ حکام ان کے ساتھ رابطے میں ہیں۔

حکام کے مطابق حادثے کی حتمی وجہ ابھی معلوم نہیں ہوسکی۔ ابتدائی معلومات میں طیارے میں بجلی سے متعلق خرابی اور حادثے سے قبل خراب موسمی حالات کا ذکر سامنے آیا ہے، تفتیش مکمل ہونے تک حادثے کی اصل وجہ کے بارے میں حتمی رائے قائم نہیں کی جاسکتی۔

امریکی کوسٹ گارڈ اور دیگر متعلقہ ادارے طیارے کے ملبے اور ممکنہ طور پر سمندر میں موجود دیگر حصوں کی تلاش کے ساتھ ساتھ لاپتا افراد کو تلاش کرنے کی کوشش کررہے ہیں،اس وقت اولین ترجیح طیارے میں سوار 6 افراد کا سراغ لگانا ہے جبکہ حادثے کی مکمل تحقیقات بعد کے مرحلے میں کی جائیں گی۔